14 красавіка, Мінск /Кар. БЕЛТА/. Народы краін Садружнасці перажываюць важны перыяд у сувязі з падрыхтоўкай да святкавання 70-годдзя Перамогі. Такое меркаванне выказаў сёння журналістам старшыня Выканаўчага камітэта - выканаўчы сакратар СНД Сяргей Лебедзеў, перадае карэспандэнт БЕЛТА.
"Народы краін Садружнасці цяпер перажываюць вельмі цікавы і важны перыяд, звязаны з падрыхтоўкай і маючым адбыцца святкаваннем 70-годдзя Перамогі ў Вялікай Айчыннай вайне. У сувязі з гэтым было прынята яшчэ два гады таму рашэнне Савета кіраўнікоў дзяржаў. Магу з задавальненнем сказаць, што ў краінах Садружнасці праведзена вельмі вялікая работа па падрыхтоўцы да святкавання гэтай вялікай даты", - адзначыў Сяргей Лебедзеў, які сёння прымае ўдзел у чарговым пасяджэнні Савета пастаянных паўнамоцных прадстаўнікоў дзяржаў - удзельніц СНД пры статутных і іншых органах Садружнасці.
На пасяджэнні абмяркоўваецца ход рэалізацыі плана асноўных мерапрыемстваў па падрыхтоўцы і святкаванні 70-й гадавіны Перамогі савецкага народа ў Вялікай Айчыннай вайне 1941-1945 гадоў. Цяпер вядзецца актыўная работа па рэалізацыі мерапрыемстваў плана, накіраваных на захаванне памяці аб загінулых у барацьбе супраць фашызму, падтрыманне ў належным стане воінскіх пахаванняў, мемарыяльных комплексаў, помнікаў і абеліскаў, а таксама магіл партызанаў, падпольшчыкаў і вязняў фашысцкіх лагераў, пошук астанкаў воінаў і мірных грамадзян, якія загінулі ў гады ВАВ.
Сяргей Лебедзеў звярнуў увагу, што ў СНД актывізавалася работа па дадатковай сацыяльнай абароне інвалідаў і ўдзельнікаў ВАВ. У прыватнасці, праводзяцца абследаванні ўмоў жыцця ветэранаў і працаўнікоў тылу ваенных гадоў. Маючым патрэбу аказваецца дапамога ў рамонце жылля, забеспячэнні палівам, устаноўцы тэлефонаў. Арганізавана бясплатнае медыцынскае абслугоўванне, у тым ліку санаторна-курортнае лячэнне і забеспячэнне лекавымі сродкамі.
У дзяржавах Садружнасці, акрамя іншага, удасканальваюцца існуючыя і ствараюцца новыя тэматычныя музейныя экспазіцыі.
Члены Савета пастаянных прадстаўнікоў адзначылі, што мерапрыемствы плана падрыхтоўкі да святкавання 70-й гадавіны Перамогі савецкага народа ў ВАВ у асноўным выконваюцца ва ўстаноўленыя тэрміны, і вырашылі аказваць усебаковую дапамогу дзяржавам - удзельніцам СНД у далейшай яго рэалізацыі.
На пасяджэнні таксама абмяркоўваецца план мерапрыемстваў па святкаванні 25-й гадавіны стварэння Садружнасці Незалежных Дзяржаў, якая будзе адзначацца ў 2016 годзе.
Акрамя таго, на парадку дня - вынікі праведзенага 3 красавіка 2015 года ў Бішкеку пасяджэння Савета міністраў замежных спраў, у якім прынялі ўдзел прадстаўнікі ўсіх дзяржаў Садружнасці.