Падзеі

Змяненне заканадаўства і ўкараненне ШІ. Як Белстат рыхтуецца да перапісу насельніцтва

Фота з архiва

22 жніўня, Мінск /Кар. БЕЛТА/. Як Белстат рыхтуецца да перапісу насельніцтва, у інтэрв'ю БЕЛТА расказала старшыня Нацыянальнага статыстычнага камітэта Іна Мядзведзева.

Што датычыцца новага раўнда перапісу, то ў чэрвені бягучага года Эканамічны і сацыяльны савет ААН прыняў рэзалюцыю аб Сусветнай праграме перапісаў насельніцтва і жыллёвага фонду раунда 2030 года, у якой заклікае ўсіх удзельнікаў-членаў правесці перапіс насельніцтва, адзначыла Іна Мядзведзева. "Рэспубліка Беларусь, якая дакладна захоўвае дзесяцігадовы інтэрвал, у год, што заканчваецца на дзявятку, праводзіць перапіс насельніцтва. Адпаведна, мы ўжо рыхтуемся да перапісу насельніцтва 2029 года. Ключавым напрамкам нашай работы сёння з'яўляецца перагляд заканадаўства, а менавіта закона "Аб перапісе насельніцтва". Нам неабходна яго актуалізаваць з улікам праведзенага перапісу 2019 года і яго вынікаў. Плюс закласці тыя пытанні, якія сёння найбольш актуальныя, - гэта максімальнае выкарыстанне адміністрацыйных рэсурсаў", - падкрэсліла яна.

Белстат плануе, як і ў мінулы раунд, праводзіць камбінаваны перапіс. "Гэта інтэрнэт і планшэты. Спадзяёмся, што ў 2029 годзе атрымаем значна большы працэнт людзей, якія пройдуць перапіс па інтэрнэце. Мы таксама разглядаем пытанні падключэння штучнага інтэлекту на пэўных этапах апрацоўкі інфармацыі, - расказала кіраўнік камітэта. - Будзем выкарыстоўваць адміністрацыйныя рэсурсы і перадзапаўненне, але будуць і пытанні, на якія неабходна будзе чалавеку адказаць самастойна. Гэта пытанні, якія датычацца ў большай ступені занятасці і міграцыйнай актыўнасці, паколькі людзі даволі мабільныя сёння".

Упершыню інтэрнэт-перапіс быў праведзены ў 2019 годзе, і такая практыка паказала вельмі добрыя вынікі, звярнула ўвагу Іна Мядзведзева. "Самастойна запоўнілі анкету ў інтэрнэце 22 працэнты насельніцтва Беларусі. Пры гэтым перапісны ліст, які запаўняецца ў такім фармаце, найбольш поўны, паколькі праграмны прадукт не дазваляў не адказаць на ўсе пытанні, - адзначыла яна. - З улікам таго, што мы выходзілі на беспапяровы перапіс, то як на планшэтах, так і ў інтэрнэце ў нас былі лагічныя, арыфметычныя кантролі, якія давалі магчымасць дабіцца максімальнай якасці атрыманых вынікаў. У сувязі з гэтым адназначна можна сказаць, што інтэрнэт-лісты былі найбольш якасныя і па паўнаце запаўнення, і па тых адказах, якія мы атрымалі ад насельніцтва Беларусі".

Паводле яе слоў, кіраўнік дзяржавы яшчэ ў 2019 годзе паставіў задачу аб пераходзе на рэгістравыя перапісы, гэта значыць без прамых пытанняў насельніцтву. "Але з улікам таго, што яшчэ не ўсе адміністрацыйныя рэсурсы даюць магчымасць атрымаць максімальны і поўны адказ на тыя ці іншыя пытанні перапісу, на гэты раз мы пастараемся яшчэ больш палепшыць гэтыя сэрвісы, каб на наступны перапіс выйсці на рэгістравы", - сказала Іна Мядзведзева.

Белстат цесна працуе з дзяржаўнымі органамі - уладальнікамі адміністрацыйных рэсурсаў. У прыватнасці, аналізуе склад, структуру і якасць іх даных для далейшага выкарыстання пры правядзенні перапісу насельніцтва.

версія для друку

зрабіць стартавай

дабавіць у выбранае