Падзеі

"Заняць запатрабаваныя нішы і сканцэнтравацца на развіцці грамадства". Пярцоў аб задачах РГА "Белая Русь"

12 ліпеня, Мінск /Кар. БЕЛТА/. РГА "Белая Русь" павінна заняць запатрабаваныя нішы і сканцэнтраваць сваю работу на развіцці грамадства. Аб гэтым заявіў першы намеснік кіраўніка Адміністрацыі Прэзідэнта Беларусі Уладзімір Пярцоў на шостым пазачарговым з'ездзе рэспубліканскага грамадскага аб'яднання "Белая Русь" у Мінску, перадае карэспандэнт БЕЛТА.

"Мы прысутнічаем сапраўды на гістарычнай падзеі. Я хачу вас павіншаваць з гэтым, і сёння агучанае адным з выступоўцаў - гвардыя Прэзідэнта, - напэўна, тое ёмістае і дакладнае азначэнне, якое з гэтага дня будзе спадарожнічаць грамадскаму аб'яднанню "Белая Русь". Вы ўсе добра разумееце, што грамадскае аб'яднанне адрозніваецца ад палітычнай партыі, не мае палітычных мэт, а сваю работу павінна сканцэнтраваць на развіцці грамадства, заняць запатрабаваныя нішы, якія да нядаўняга часу займалі фінансуемыя з-за мяжы некамерцыйныя і няўрадавыя арганізацыі, уключыць у работу грамадскія арганізацыі, - адзначыў Уладзімір Пярцоў. - Цяпер надышоў той час, калі мы павінны ўключыць у работу грамадскія арганізацыі, іншыя неахопленыя колы нашага грамадства - бізнес, фермерскую супольнасць, інтэлігенцыю, IT-сферу, сферу паслуг, індустрыю адпачынку і забаў. Я ўпэўнены, што гэта атрымаецца ў вашай арганізацыі пад кіраўніцтвам Андрэя Іванавіча (Іванца. - Заўвага БЕЛТА)".

Уладзімір Пярцоў закрануў тэму, якая прагучала ў час нядаўняй сустрэчы Прэзідэнта з кіраўніцтвам Адміністрацыі Прэзідэнта, - работу са зваротамі грамадзян. "На жаль, не ўсе звароты, якія могуць быць разгледжаны і вырашаны на месцах, разглядаюцца і вырашаюцца. Вы ведаеце аб гэтым. У вас ёсць дзейсны інструмент - грамадскія прыёмныя "Белай Русі". Калі вы не можаце вырашыць, то, прынамсі, можаце падказаць чалавеку, які ідзе са сваёй просьбай у грамадскую прыёмную, куды яму звярнуцца. І з існуючымі ў вас адміністрацыйным рэсурсам дапамагчы гэтаму чалавеку дастукацца да таго чыноўніка, у кампетэнцыі якога вырашэнне яго надзённай праблемы. Большасць такіх пытанняў і праблем, як было сказана кіраўніком дзяржавы, павінны і могуць вырашацца на месцах. Калі ласка, пераарыентуйце сваю работу і ў гэтым", - падкрэсліў першы намеснік кіраўніка Адміністрацыі Прэзідэнта.

З сённяшняга дня старшынёй рэспубліканскага грамадскага аб'яднання "Белая Русь" выбраны Андрэй Іванец. Такое рашэнне прынята на першым пасяджэнні Рэспубліканскага савета грамадскага аб'яднання ў прысутнасці дэлегатаў 6-га пазачарговага з'езда РГАА "Белая Русь".

версія для друку

зрабіць стартавай

дабавіць у выбранае