Падзеі

Хрэнін: "Шчыт Саюза - 2023" стане галоўным мерапрыемствам падрыхтоўкі войскаў Беларусі і Расіі

Фота з архiва

2 лістапада, Мінск /Кар. БЕЛТА/. Аператыўнае вучэнне "Шчыт Саюза - 2023" стане галоўным мерапрыемствам сумеснай падрыхтоўкі войскаў Беларусі і Расіі ў наступным годзе. Аб гэтым на пасяджэнні сумеснай Калегіі міністэрстваў абароны Беларусі і Расіі заявіў міністр абароны Віктар Хрэнін, паведамляе БЕЛТА са спасылкай на прэс-службу ваеннага ведамства Беларусі.

"Я ўпэўнены, што сённяшняе пасяджэнне з'яўляецца чарговым сумесным крокам на шляху ўмацавання ваеннай бяспекі нашых дзяржаў. Гэта асабліва важна ў такі няпросты перыяд не толькі для Беларусі, Расіі і Саюзнай дзяржавы, але і для міжнароднага міру і бяспекі ў цэлым. Нам разам даводзіцца шукаць меры процідзеяння існуючаму беспрэцэдэнтнаму націску і гібрыднаму ўздзеянню на Беларусь і Расію. Каля граніц Саюзнай дзяржавы праводзіцца неабгрунтаваная мілітарызацыя ўсяго ўсходняга фланга Паўночнаатлантычнага альянсу і актыўна ўдасканальваецца ваенная інфраструктура. На сумежных тэрыторыях у разы павялічана колькасць мерапрыемстваў аператыўнай і баявой падрыхтоўкі альянсу, больш таго - з вуснаў палітыкаў гучыць ваяўнічая рыторыка", - сказаў Віктар Хрэнін.

Міністр абароны падкрэсліў, што, нягледзячы на тое, што адбываецца, у гэтым годзе ў беларуска-расійскім ваенным супрацоўніцтве ўдалося дасягнуць значных вынікаў. Для ўдасканалення аб'яднаных ваенных сістэм органы ваеннага кіравання Беларусі і Расіі праводзяць сумесныя мерапрыемствы, ідзе абмен перадавым вопытам, удасканальваецца нарматыўная прававая база, а таксама праводзяцца сумесныя трэніроўкі. У гэты момант пачата падрыхтоўка да правядзення сумеснага аператыўнага вучэння "Шчыт Саюза - 2023".

"Галоўная мэта сённяшняга пасяджэння сумеснай Калегіі - гэта ў першую чаргу ўдакладненне парадку далейшай работы па стварэнні і ўмацаванні неабходнага сумеснага ваеннага патэнцыялу з мэтай процідзеяння выклікам і пагрозам ваеннага характару, накіраваным супраць Саюзнай дзяржавы. У ходзе калегіі сярод іншых пытанняў мы заслухаем даклады аб асноўных напрамках процідзеяння спробам фальсіфікацыі гісторыі, а таксама аб стане і напрамках удасканалення Адзінай рэгіянальнай сістэмы проціпаветранай абароны. Абмяркуем асновы задумы сумеснага аператыўнага вучэння ўзброеных сіл Расійскай Федэрацыі і Рэспублікі Беларусь "Шчыт Саюза - 2023", якое стане галоўным мерапрыемствам сумеснай падрыхтоўкі органаў ваеннага кіравання і войскаў у будучым годзе", - прадоўжыў Віктар Хрэнін.

Канструктыўнае абмеркаванне пытанняў, якія плануюцца да разгляду на пасяджэнні сумеснай Калегіі, будзе садзейнічаць развіццю і паглыбленню ваеннага супрацоўніцтва, узгадненню пазіцый і перспектыў сумеснай ваеннай дзейнасці на карысць забеспячэння ваеннай бяспекі Саюзнай дзяржавы, упэўнены міністр абароны.

Пад старшынствам міністра абароны Беларусі генерал-лейтэнанта Віктара Хрэніна ў фармаце відэа-канферэнц-сувязі праходзіць штогадовае пасяджэнне сумеснай Калегіі міністэрстваў абароны Беларусі і Расіі. У пасяджэнні сумеснай калегіі прымаюць удзел Надзвычайны і Паўнамоцны Пасол Расійскай Федэрацыі ў Рэспубліцы Беларусь Барыс Грызлоў, прадстаўнікі Парламенцкага сходу Саюза Беларусі і Расіі, прадстаўніцтва Пастаяннага камітэта Саюзнай дзяржавы ў Мінску, апарату аташэ Расійскай Федэрацыі, а таксама эксперты ад абароннага ведамства Беларусі.

Мэтай мерапрыемства з'яўляецца арганізацыя практычнай работы па стварэнні і ўмацаванні неабходнага сумеснага ваеннага патэнцыялу з мэтай процідзеяння выклікам і пагрозам ваеннага характару, якія накіраваны супраць Саюзнай дзяржавы. На пасяджэнні падвядуць вынікі дзейнасці абаронных ведамстваў за мінулы перыяд, выканання мерапрыемстваў па забеспячэнні ваеннай бяспекі Саюзнай дзяржавы. Увагу ўдзеляць пытанням удасканалення Адзінай рэгіянальнай сістэмы проціпаветранай абароны Беларусі і Расіі, а таксама ўдасканаленню аб'яднаных ваенных сістэм.

версія для друку

зрабіць стартавай

дабавіць у выбранае