Падзеі

Віншаванні з Днём Перамогі паступаюць у адрас Лукашэнкі і беларускага народа

9 мая, Мінск /Кар. БЕЛТА/. У адрас Прэзідэнта Беларусі Аляксандра Лукашэнкі і беларускага народа паступаюць шматлікія віншаванні з 78-й гадавінай Перамогі ў Вялікай Айчыннай вайне. Аб гэтым БЕЛТА паведамілі ў прэс-службе беларускага лідара.

Пажаданні міру, дабрабыту і працвітання беларускаму народу накіроўваюць замежныя лідары, кіраўнікі інтэграцыйных аб'яднанняў, вядомыя дзеячы розных сфер.

Прэзідэнт Расійскай Федэрацыі Уладзімір Пуцін у віншавальным пасланні падкрэсліў, што ў сэрцах расіян і беларусаў Дзень Перамогі заўсёды быў і застанецца сімвалам мужнасці і гераізму, самаахвярнасці і ўзаемавыручкі: "Нашы народы ніколі не забудуць бяспрыкладных подзвігаў франтавікоў, партызан і падпольшчыкаў - як не забудуць і страшэнных злачынстваў, учыненых нацысцкімі захопнікамі ў гады Вялікай Айчыннай вайны. Амаль восем дзесяцігоддзяў мінула з таго часу, як нашы бацькі і дзяды цаной велізарных ахвяр і нягод пакончылі з "карычневай чумой". Аднак сёння нам даводзіцца процістаяць ідэйным наследнікам гітлераўцаў - неанацыстам і іх памагатым, на сумленні якіх тысячы чалавечых жыццяў".

"У Расіі высока цэняць актыўны ўдзел беларускіх сяброў у ажыццяўленні бяспекі Саюзнай дзяржавы. Упэўнены, што, аб'ядноўваючы намаганні і абапіраючыся на добрыя традыцыі братэрскай дружбы і ўзаемавыручкі, загартаваныя ў суровыя ваенныя гады расіяне і беларусы змогуць пераадолець любыя выпрабаванні", - адзначыў расійскі лідар. Ён папрасіў перадаць усім ветэранам, якія жывуць у Беларусі, словы шчырай удзячнасці, а таксама пажаданні добрага здароўя, дабрабыту і даўгалецця.

Прэзідэнт Таджыкістана Эмамалі Рахмон перакананы, што выпрабаваныя часам таджыкска-беларускія адносіны дружбы і шматграннага супрацоўніцтва і ў далейшым будуць няўхільна развівацца на карысць нашых народаў і краін. "У гэты дзень мы ўшаноўваем вялікі подзвіг, сілу духу, патрыятызм і гераізм нашых народаў, з удзячнасцю шануем памяць тых, хто на палях бітваў і ў тыле сваёй бяспрыкладнай адвагай і доблесцю набліжаў доўгачаканы дзень Перамогі", - гаворыцца ў віншавальным пасланні.

Эмамалі Рахмон пажадаў Аляксандру Лукашэнку моцнага здароўя і дабрабыту, а братэрскаму народу Беларусі - мірнага неба, спакою і ўстойлівага працвітання.

Віншаванне паступіла ад Прэзідэнта Туркменістана Сердара Бердымухамедава: "Дзень 9 Мая з'яўляецца слаўнай датай нашай агульнай гісторыі. Гэта знамянальная дата - сімвал нашай вечнай агульнай памяці аб тых, хто праявіў бяспрыкладны гераізм у імя свабоднага і шчаслівага жыцця будучых пакаленняў. Мы з глыбокай павагай і гордасцю ўспамінаем нашых бацькоў і дзядоў, якія змагаліся плячо ў плячо на франтах, дэманструючы высокія ўзоры мужнасці, патрыятызму, адвагі і нязломнай волі, разам набліжаючы доўгачаканую Перамогу. Перакананы, што дружба і братэрства нашых народаў, якія прайшлі праз вельмі цяжкія выпрабаванні ваенных гадоў, будуць і ў далейшым садзейнічаць умацаванню і развіццю плённых адносін паміж Туркменістанам і Рэспублікай Беларусь".

Сердар Бердымухамедаў пажадаў здароўя, шчасця і дабрабыту ветэранам Вялікай Айчыннай вайны і ўсяму дружалюбнаму народу Беларусі.

Прэзідэнт Узбекістана Шаўкат Мірзіёеў у віншавальным пасланні, якое паступіла ад яго, падкрэсліў, што 9 Мая - гэта свяшчэннае для ўсіх нас свята, нягаснучы сімвал гонару, доблесці, стойкасці і велізарнай мужнасці нашых народаў. "У гэты дзень мы аддаём даніну памяці загінулым героям-вызваліцелям, ушаноўваем усіх, хто каваў Перамогу на фронце і ў тыле. Іх вялікі подзвіг назаўсёды застанецца высокім прыкладам самаадданасці і патрыятызму для цяперашняга і будучых пакаленняў. Перакананы, што добрыя традыцыі ўсё больш моцнай дружбы і ўзаемнай павагі нашых народаў будуць і ў далейшым садзейнічаць развіццю ўзбекска-беларускага шматпланавага супрацоўніцтва. Жадаю Вам моцнага здароўя і поспехаў у Вашай дзяржаўнай дзейнасці, а беларускаму народу - міру і дабрабыту", - гаворыцца ў віншаванні.

Першы Прэзідэнт Казахстана Нурсултан Назарбаеў адрасаваў доблесным ветэранам вайны словы ўдзячнасці за Перамогу, а дружалюбнаму народу Беларусі - сардэчныя пажаданні міру і дабрабыту. "У гэты свяшчэнны дзень мы з гонарам успамінаем імёны тых, хто каваў на палях бітваў і ў тыле перамогу для нас і будучых пакаленняў, цаной уласнага жыцця праклаўшы шлях да свабоды і мірнага неба над галавой. Дзень Вялікай Перамогі назаўсёды застанецца сімвалам гераізму і адзінства нашых народаў", - падкрэсліў ён.

Прэм'ер-міністр Арменіі Нікол Пашынян адзначыў, што ў гэты памятны дзень беларусы і армяне з гордасцю і глыбокай удзячнасцю шануюць памяць мільёнаў суайчыннікаў - франтавікоў і працаўнікоў тылу, якія сваім бяспрыкладным гераізмам і самаадданасцю вызвалілі чалавецтва ад фашызму. "Упэўнены, што памяць аб вялікай перамозе будзе і ў далейшым служыць непахісным фундаментам для ўмацавання дружалюбных адносін паміж нашымі краінымі", - гаворыцца ў яго віншаванні.

"У гэты памятны для ўсіх нас дзень мы з глыбокай павагай і шчырай удзячнасцю схіляем галовы перад памяццю нашых бацькоў і дзядоў, мужнасць і самаадданасць якіх на франтах і ў тыле сталі яскравым прыкладам стойкасці духу і непахіснай волі для будучых пакаленняў", - у сваю чаргу адзначыў Прэзідэнт Арменіі Ваагн Хачатуран.

Ён выказаў перакананне, што загартаваная ў гады Вялікай Айчыннай вайны дружба беларускага і армянскага народаў будзе і ў далейшым служыць трывалай асновай для наступнага развіцця двухбаковых адносін.

Прэзідэнт Венесуэлы Нікалас Мадура ў віншавальным пасланні падкрэсліў значнасць вялікага ратнага подзвігу, выкаванага мужнасцю і крывёй герояў Вялікай Айчыннай вайны. "Урад Венесуэлы імкнецца падтрымліваць і пашыраць супрацоўніцтва ў імя міру з мэтай умацавання шматпалярнай і поліцэнтрычнай сістэмы міжнародных адносін, накіраваных на развіццё і павышэнне дабрабыту народаў, з улікам складанасці геапалітычнай сітуацыі і нарастаючай агрэсіі з боку шэрага дзяржаў, якія ўводзяць незаконныя аднабаковыя абмежавальныя меры. Прыміце гэта пасланне як выказванне нашых цёплых пачуццяў і гатоўнасці ўстанаўліваць яшчэ больш цесныя двухбаковыя адносіны", - адзначыў венесуэльскі лідар.

"За перамогу! За Радзіму-маці! Няхай жыве Беларусь! Мы пераможам!" - такімі словамі завяршаецца віншаванне ад Прэзідэнта Венесуэлы.

З Днём Перамогі Прэзідэнта Беларусі, які цяпер таксама з'яўляецца Старшынёй Савета калектыўнай бяспекі АДКБ, павіншаваў генеральны сакратар гэтай арганізацыі Імангалі Тасмагамбетаў. Ён падкрэсліў неацэнны ўклад беларускага народа ў гэту Перамогу. "Гістарычныя традыцыі дружбы, братэрства, з'яднанасці і ўзаемнай падтрымкі, якія ўмацаваліся ў гады вайны, служаць надзейнай асновай для развіцця супрацоўніцтва дзяржаў - членаў АДКБ, умацавання бяспекі і стабільнасці на еўразійскай прасторы", - гаворыцца ў віншаванні.

Віншаванне паступіла і ад генеральнага сакратара СНД Сяргея Лебедзева. "Трагічныя ўрокі мінулай вайны абавязваюць нас сёння беражліва захоўваць і развіваць шматбаковае міждзяржаўнае супрацоўніцтва, умацоўваць стабільнасць і бяспеку на прасторы нашага інтэграцыйнага аб'яднання", - адзначыў ён.

версія для друку

зрабіць стартавай

дабавіць у выбранае