Падзеі

Узбекістан адзначае актывізацыю двухбаковага дыялогу з Беларуссю ў культурна-гуманітарным супрацоўніцтве

Фота з архiва

13 красавіка, Мінск /Кар. БЕЛТА/. Узбекістан адзначае актывізацыю двухбаковага дыялогу з Беларуссю ў сферы культурна-гуманітарнага супрацоўніцтва, заявіў саветнік міністра культуры і турызму Узбекістана Шаўкатджон Артыкаў перад гала-канцэртам на сцэне Белдзяржфілармоніі, якім адкрыліся Дні культуры Узбекістана ў Беларусі, перадае карэспандэнт БЕЛТА.

"У студзені гэтага года споўнілася 30 гадоў з дня ўстанаўлення дыпламатычных адносін паміж нашымі дзяржавамі. Гаворачы аб гэтай юбілейнай даце, трэба адзначыць, што адносіны Узбекістана і Беларусі ў апошнія гады паспяхова развіваюцца, асабліва ў духу дружбы і партнёрства", - адзначыў Шаўкатджон Артыкаў.

Паводле яго слоў, важнай асновай для гэтага служаць устаноўленыя добрыя, дружалюбныя адносіны паміж кіраўнікамі дзяржаў, іх рэгулярныя сустрэчы. У верасні 2018 года Прэзідэнт Беларусі Аляксандр Лукашэнка наведаў Узбекістан з афіцыйным візітам. У 2019 годзе адбыўся афіцыйны візіт у адказ у Беларусь лідара Узбекістана Шаўката Мірзіёева. Кантакты на вышэйшым узроўні адкрылі новую старонку ў супрацоўніцтве паміж краінамі.

Актывізацыя двухбаковага дыялогу таксама непасрэдна праяўляецца ў сферы культурна-гуманітарнага супрацоўніцтва, заўважыў Шаўкатджон Артыкаў. У апошнія гады творчыя калектывы з Беларусі актыўна ўдзельнічаюць у музычным фестывалі "Шарк тароналары" ("Мелодыі Усходу"), а прадстаўнікі Узбекістана - у міжнародных фестывалях "Славянскі базар у Віцебску" і "Залатая пчолка", а таксама ў Мінскім міжнародным Калядным конкурсе вакалістаў.

У красавіку 2018 года ў Ташкенце прайшлі Дні культуры і кіно Беларусі ва Узбекістане, а ў ліпені 2019 года - Дні культуры і мастацтва Узбекістана ў Беларусі.

У верасні 2021 года ў Мінску былі арганізаваны Дні ўзбекскага кіно з дэманстрацыяй шэрага новых кінакарцін узбекскіх кінематаграфістаў. У міжнародных кінафестывалях у Ташкенце і Мінску актыўна ўдзельнічаюць кінематаграфісты абедзвюх краін.

Акрамя таго, абедзве краіны валодаюць унікальнымі магчымасцямі і патэнцыялам у турыстычнай сферы, упэўнены саветнік міністра. Ён заўважыў, што ва Узбекістане вялікая ўвага ўдзяляецца імкліваму развіццю турыстычнага сектара, стварэнню ўсіх зручнасцей для замежных гасцей. У гэтым годзе ва Узбекістане адбудзецца чарговая сесія Генеральнай асамблеі Сусветнай турысцкай арганізацыі. Краіна плануе прыцягнуць у 2023-м 7 млн замежных турыстаў. Беларусы таксама запрашаюцца наведаць Узбекістан, у тым ліку такія гістарычныя гарады, як Самарканд, Бухара і Хіва, на свае вочы ўбачыць унікальныя архітэктурныя помнікі, азнаёміцца з багатай культурай і нацыянальнымі каштоўнасцямі народа, адчуць усходнюю гасціннасць.

У сённяшняй канцэртнай праграме, прысвечанай афіцыйнаму адкрыццю Дзён культуры Узбекістана, прымаюць удзел самыя вядомыя, выдатныя артысты і творчыя калектывы Узбекістана. Сярод іх народныя, заслужаныя артысты Узбекістана і іншыя дзеячы мастацтва, удастоеныя дзяржаўных узнагарод.

Мерапрыемствы Дзён культуры Узбекістана прадоўжацца 14 красавіка ў Слуцку, культурнай сталіцы Беларусі 2023 года.

версія для друку

зрабіць стартавай

дабавіць у выбранае