Падзеі

Турчын: беларуска-кітайскія адносіны - прыклад стратэгічнага партнёрства

6 чэрвеня, Мінск /Кар. БЕЛТА/. Беларуска-кітайскія адносіны - прыклад стратэгічнага партнёрства. Аб гэтым заявіў прэм'ер-міністр Беларусі Аляксандр Турчын у час сустрэчы з намеснікам старшыні КНР Хань Чжэнам, перадае карэспандэнт БЕЛТА.

"Беларуска-кітайскія адносіны сёння - прыклад сталага, давернага і арыентаванага ў будучае стратэгічнага партнёрства. Асабліва важна, што фундаментам нашага ўзаемадзеяння выступае не толькі высокі ўзровень палітычнага дыялогу, але і эканамічны складнік - гандаль, інвестыцыі, прамысловая кааперацыя, тэхніка-эканамічная дапамога", - сказаў Аляксандр Турчын.

Прэзідэнт Беларусі Аляксандр Лукашэнка 12 мая падпісаў Дырэктыву "Аб практычным напаўненні ўсепагоднага і ўсебаковага стратэгічнага партнёрства Рэспублікі Беларусь з Кітайскай Народнай Рэспублікай". "Кітай - адзіная замежная дзяржава, па якой прымаюцца дакументы такога ўзроўню. Беларусь разглядае Кітай як аднаго з ключавых эканамічных партнёраў і стратэгічнага инвестара. Мы паслядоўна працуем над спалучэннем ініцыятывы "Адзін пояс, адзін шлях" з нацыянальнымі прыярытэтамі сацыяльна-эканамічнага развіцця Беларусі, фарміруючы сучасныя транспартна-лагістычныя, вытворчыя і тэхналагічныя маршруты Еўразіі", - адзначыў прэм'ер-міністр.

Асаблівае значэнне надаецца развіццю індустрыяльнага парка "Вялікі камень", які стаў знакавым сумесным праектам і платформай для прамысловай, навукова-тэхнічнай і інавацыйнай кааперацыі. "Мы бесперапынна ўдасканальваем і паляпшаем умовы работы ў парку ў мэтах нарошчвання прысутнасці кітайскіх інвестараў, лакалізацыі высокатэхналагічных вытворчасцей, стварэння сумесных прадпрыемстваў і сумеснага пашырэння прадукцыі на рынкі трэціх краін", - падкрэсліў Аляксандр Турчын.

Асобную ўвагу Беларусь удзяляе супрацоўніцтву ў сферы навукі, штучнага інтэлекту, машынабудавання. "Перакананы, што аб'яднанне навуковага патэнцыялу і тэхналагічных магчымасцей нашых краін дасць магчымасць забяспечыць якасна новы ўзровень эканамічнага ўзаемадзеяння", - дадаў прэм'ер-міністр.

Беларусь і Кітай аб'явілі 2026-2027-ы Гадамі прамысловай кааперацыі. Як адзначыў кіраўнік беларускага ўрада, гэта адзін з галоўных прыярытэтаў супрацоўніцтва паміж дзвюма краінамі.

"Карыстаючыся выпадкам, хачу павіншаваць Кітай з паспяховым правядзеннем штогадовых "дзвюх сесій", а таксама з прыняццем 15-й пяцігадовай праграмы сацыяльна-эканамічнага развіцця КНР на 2026-2030 гады. Беларусь таксама ў канцы 2025 года правяла Усебеларускі народны сход, па выніках якога прынята праграма сацыяльна-эканамічнага развіцця нашай краіны на 2026-2030 гады", - абазначыў Аляксандр Турчын.

Два планы развіцця падобны не толькі па сваёй сутнасці, але і па зададзеных вектарах. "Прынятыя ў нашых краінах рашэнні пацвярджаюць стратэгічны і доўгатэрміновы падыход да забеспячэння ўстойлівага эканамічнага росту, тэхналагічнай мадэрнізацыі, умацавання энергетычнай бяспекі і павышэння якасці жыцця грамадзян. Важны акцэнт зроблены на ўмацаванні экспартнага патэнцыялу краін і падтрыманні тэхналагічнага суверэнітэту, што ў наш час вельмі дарагога варта. Мы ўпэўнены, што рэалізацыя задач 15-й пяцігодкі дасць магчымасць Кітаю паспяхова дасягнуць пастаўленых стратэгічных мэт, умацаваць пазіцыі аднаго з вядучых цэнтраў сусветнай эканомікі і забяспечыць далейшае павышэнне дабрабыу кітайскага народа, - падкрэсліў Аляксандр Турчын. - Мы таксама падтрымліваем намаганні Кітая па ўмацаванні адкрытай сусветнай эканомікі, развіцці ўстойлівых вытворчых ланцужкоў і фарміраванні справядлівай сістэмы міжнароднага эканамічнага супрацоўніцтва".

Прэм'ер-міністр таксама выказаў шчырую ўдзячнасць кітайскаму боку за актыўны ўдзел у арганізацыі і правядзенні 7 чэрвеня ў рамках Міжнароднай спецыялізаванай выстаўкі "Белагра-2026" значнага форуму "Вялікі рынак для ўсіх: экспарт у Кітай", а ў пачатку ліпеня 2026 года ў правінцыі Ганьсу - першага Беларуска-Кітайскага форуму рэгіёнаў. "Перакананы, што іх правядзенне забяспечыць прыкладное напаўненне ўсебаковага стратэгічнага партнёрства паміж нашымі краінамі", - падкрэсліў кіраўнік урада.

Прэм'ер-міністр выказаў упэўненасць, што візіт намесніка старшыні КНР у Беларусь стане важным крокам у рэалізацыі новых сумесных праектаў і дасць магчымасць надаць дадатковы імпульс беларуска-кітайскаму практычнаму ўзаемадзеянню. "Спадзяюся, у ходзе візіту ў вас будзе магчымасць ацаніць прыгажосць нашай краіны і гасціннасць беларускага народа", - падкрэсліў ён.

Аляксандр Турчын таксама паведаміў, што плануе правесці рабочую сустрэчу з прэм'ерам Дзяржаўнага савета КНР Лі Цянам у рамках Кітайскай міжнароднай выстаўкі імпарту ў Шанхаі ў лістападзе бягучага года.

Хань Чжэн адзначыў, што гэта яго першы візіт у Беларусь. "Дружба паміж нашымі краінамі мае доўгую гісторыю і з часам становіцца толькі мацней", - сказаў ён і падкрэсліў, што адносіны паміж краінамі развіваюцца на высокім узроўні і прыносяць карысць народам.