Падзеі
Тэртэль: паміж Беларуссю і Польшчай ідзе дыялог, мы дасягнём выніку
24 снежня, Мінск /Кар. БЕЛТА/. Паміж Беларуссю і Польшчай ідзе дыялог. Гэта цяжкая і сур'ёзная работа, але вынік будзе дасягнуты. Аб гэтым па выніках даклада Прэзідэнту Беларусі Аляксандру Лукашэнку заявіў журналістам старшыня КДБ Беларусі Іван Тэртэль, перадае карэспандэнт БЕЛТА.
"З Польшчай у нас ідзе дыялог. Я сказаў бы, што мы дасягнём выніку. Трэба, каб польскі бок, скажам так, стымуляваў некаторых сваіх саюзнікаў выканаць свае саюзніцкія абавязацельствы. У нас такое разуменне ёсць, у іх таксама разуменне ёсць. Работа цяжкая, сур'ёзная работа", - сказаў Іван Тэртэль. Ён таксама падкрэсліў, што адпаведная работа вядзецца пад вельмі чуткім патранажам і кантролем з боку кіраўніка дзяржавы.
Кіраўнік КДБ адзначыў, што хоць Польшча з'яўляецца членам НАТА, Еўрапейскага саюза, мае цесныя адносіны з ЗША, але польскі бок заўсёды адрознівала арыентацыя на свае ўласныя нацыянальныя інтарэсы. "Таму мы ўсё ж такі назіраем пэўнае ўсведамленне тых няправільных крокаў, якія былі зроблены папярэднім польскім кіраўніцтвам. Звязаныя з закрыццём граніц, спробамі націску, пытаннямі міграцыі і іншымі рэчамі - эканомікай, транзітам тавараў, людзей праз нашу тэрыторыю", - заявіў ён.
Паводле яго слоў, дыялог з польскім бокам не спыняўся ніколі. Напрыклад, існавалі кантакты паміж дыпламатычнымі ведамствамі на розным узроўні. "Цяпер яны перайшлі ў больш актыўную фазу. Вядома, ёсць кантакты паміж спецслужбамі", - сказаў Іван Тэртэль.
Ён растлумачыў, што часам менавіта канал па лініі спецслужбаў неабходны, каб у ціхай абстаноўцы вырашаць тыя ці іншыя істотныя для бакоў пытанні. "Заўсёды знаходзяцца агульныя падыходы, і мы можам адкрыта гэтыя пытанні абмяркоўваць, - адзначыў старшыня КДБ. - Так, па лініі спецслужбаў таксама ёсць кантакты з польскім бокам, у час якіх абмяркоўваюцца найбольш вострыя пытанні. Мы, вядома, па даручэнні кіраўніка дзяржавы працуем у гэтым кантэксце цесна з нашымі калегамі з Міністэрства замежных спраў. Настрой, зноў жа, нам задае кіраўнік дзяржавы".
Іван Тэртэль звярнуў увагу, што ў адносінах да Польшчы Беларусь не раз на працягу апошніх гадоў прымала жэст добрай волі: "Памілаванне і вызваленне асоб, асуджаных за шпіянаж. І іншыя дзеянні, якія былі не публічнымі".
"Мы пэўны водгук атрымлівалі, але не заўсёды знаходзілі вырашэнне тых ці іншых вострых праблем. Цяпер такіх вострых праблем фактычна тры-чатыры ёсць. Яны звязаны з неабходнасцю рабіць сустрэчныя крокі, разумеючы нашу зацікаўленасць у эканамічным развіцці, развіцці сувязей паміж людзьмі. І іншыя пытанні, якія патрабуюць вырашэння", - дадаў кіраўнік КДБ.
Ён адзначыў, што абмяркоўваюцца і пытанні, звязаныя з так званымі падрыўнымі цэнтрамі, якія існуюць на тэрыторыі суседніх дзяржаў - у краінах Балтыі, Польшчы і Украіне. "Мы абмяркоўваем з нашымі калегамі даволі адкрыта ў час гэтых кантактаў. Яны разумеюць, што тыя праекты, якія намячаліся і пачалі рэалізоўвацца ў 2020 годзе, ужо немагчыма рэалізаваць. Таму для іх гэта пэўны цяжар, які яны хацелі б з сябе скінуць і не мець гэтага раздражняльніка ў адносінах", - растлумачыў Іван Тэртэль.
Больш таго, ён падкрэсліў, што фінансавыя сродкі, якія ўкладваюцца ў такую дзейнасць за мяжой, таксама ў выніку патрабуюць аддачы. Аднак з таго боку ёсць разуменне, што цяпер нешта зрабіць у гэтым плане ўнутры краіны і неяк дэстабілізаваць абстаноўку ў Беларусі не ўяўляецца магчымым, а адпаведныя затраты кладуцца сур'ёзным цяжарам.
версія для друку
зрабіць стартавай
дабавіць у выбранае