Падзеі

Татарыновіч: Азербайджан, як і Беларусь, цвёрда праводзіць незалежную палітыку

Фота Савета Рэспублікі

30 кастрычніка, Мінск /Кар. БЕЛТА/. Азербайджанская Рэспубліка, як і Рэспубліка Беларусь, цвёрда праводзіць незалежную палітыку, заявіў намеснік старшыні Савета Рэспублікі Уладзіслаў Татарыновіч, выступаючы ў Баку на міжнароднай парламенцкай канферэнцыі, прысвечанай 30-годдзю з дня прыняцця Канстытуцыі Азербайджана. Тэкст выступлення размешчаны на сайце Савета Рэспублікі, паведамляе БЕЛТА.

Уладзіслаў Татарыновіч адзначыў, што прыняцце Канстытуцыі з'яўляецца важнейшай вяхой у станаўленні і развіцці кожнай краіны і грунтуецца на неад'емным праве народа самастойна вызначаць свой лёс і быць паўнапраўным суб'ектам сусветнай супольнасці. Канстытуцыя вызначае аблічча грамадства і дзяржавы на многія гады, яго прававыя асновы і фундамент, лад жыцця і будучыню.

"Кожная краіна на шляху да дэмакратыі адпрацоўвае сваю мадэль дзяржаўнага будаўніцтва. Азербайджанская Рэспубліка, як і Рэспубліка Беларусь, цвёрда праводзіць незалежную палітыку", - падкрэсліў віцэ-спікер.

Доказам таго, паводле яго слоў, служаць дасягненні ў розных сферах - стабільнасць палітычнай, эканамічнай і сацыяльнай сістэм, рост аўтарытэту на міжнароднай арэне, захаванне нацыянальнай самасвядомасці і традыцый.

Намеснік старшыні адзначыў, што асаблівую танальнасць міждзяржаўным адносінам Беларусі і Азербайджана задаюць лідары дзяржаў Аляксандр Лукашэнка і Ільхам Аліеў.

Ён нагадаў, што 28 мая бягучага года ў віншаванні кіраўніку і ўсім жыхарам краіны з Днём Незалежнасці беларускі лідар Аляксандр Лукашэнка адзначыў, што Азербайджан сёння па праву ганарыцца эканомікай, няўхільным павышэннем ўзроўню жыцця грамадзян, важкімі дасягненнямі на міжнароднай арэне.

Уладзіслаў Татарыновіч выказаў упэўненасць у тым, што супрацоўніцтва Беларусі і Азербайджана будзе і далей развівацца на аснове традыцый дружбы і ўзаемаразумення, узаемнага даверу і павагі.

Віцэ-спікер таксама падзяліўся беларускім вопытам канстытуцыйнага будаўніцтва.

На палях канферэнцыі прайшла сустрэча намесніка старшыні Савета Рэспублікі са старшынёй Мілі Меджліса Азербайджанскай Рэспублікі Сахібай Гафаравай. Была адзначана важнасць актыўнага міждзяржаўнага дыялогу паміж краінамі, асновай якога з'яўляецца поўнае ўзаемаразуменне прэзідэнтаў Беларусі і Азербайджана. Сахіба Гафарава высока ацаніла беларуска-азербайджанскае міжпарламенцкае ўзаемадзеянне, падкрэсліла важнасць яго далейшай актывізацыі і садзейнічання ў рэалізацыі канкрэтных праектаў у сферы медыцыны, культуры, адукацыі, у тым ліку з актыўным уключэннем рэгіёнаў абедзвюх дзяржаў.

версія для друку

зрабіць стартавай

дабавіць у выбранае