Падзеі

Сямашка: аснову для супрацоўніцтва Беларусі і краін Азіі ствараюць агульныя арыенціры, у тым ліку - на сусветнай арэне

Фота з архiва

9 чэрвеня, Масква /Эдуард Півавар - БЕЛТА/. Аснову для развіцця супрацоўніцтва Беларусі і краін азіяцкага рэгіёна ствараюць агульныя арыенціры, у тым ліку ў пытаннях міжнароднага парадку дня. Аб гэтым заявіў пасол Беларусі ў Расіі Уладзімір Сямашка сёння ў Маскве на Беларуска-азіяцкім форуме, перадае карэспандэнт БЕЛТА.

"Упэўнены ў тым, што аснову для нашага супрацоўніцтва ствараюць не толькі арыенціры сацыяльна-эканамічнага развіцця і падабенства пазіцый у пытаннях міжнароднага парадку дня, але і тое, што ў характары нашых народаў - адкрытасць, добразычлівасць, дружалюбнасць", - сказаў Уладзімір Сямашка.

Ён падкрэсліў, што Беларусь актыўна развівае супрацоўніцтва з замежнымі партнёрамі ў розных частках свету. "На тэрыторыі нашай краіны сыходзяцца важнейшыя транспартныя шляхі паміж Еўропай і Азіяй, - канстатаваў пасол. - Як неаднаразова адзначаў Прэзідэнт Беларусі Аляксандр Лукашэнка, мы - геаграфічны цэнтр Еўропы, у нас была і будзе шматвектарная знешняя палітыка. З гэтага зыходзім у выбудоўванні свайго курсу, заснаванага на прынцыпах міралюбнасці, роўнасці і ўзаемнай павагі".

Паводле слоў дыпламата, у апошнія гады ўмацаваліся адносіны Беларусі з партнёрамі ў краінах Азіі. "Сёння дзяржавы Азіі ўпэўнена рухаюцца па шляху сацыяльна-эканамічнага і навукова-тэхнічнага развіцця, адыгрываюць усё большую ролю ў міжнародных справах, - заўважыў Уладзімір Сямашка. - Азіяцкі рэгіён уяўляе сабой ёмісты і перспектыўны рынак для беларускіх тавараў і паслуг, мэтавы рынак і крыніца для ўзаемных інвестыцый. Таму развіццё шматпланавых сувязей з гэтым дынамічным у развіцці рэгіёнам уяўляе для Беларусі вялікую значнасць. Беларусь мае рэпутацыю надзейнага эканамічнага партнёра, якога адрознівае адказны падыход да выканання прынятых на сябе абавязацельстваў і створаны ў краіне спрыяльны бізнес-клімат. У рэспубліцы функцыянуюць шэсць свабодных эканамічных зон, беларуска-кітайскі індустрыяльны парк «Вялікі камень». Усё гэта садзейнічае стварэнню сумесных вытворчасцей, адкрыццю тавараправодных сетак і прадстаўніцтваў, актыўнаму дзелавому ўзаемадзеянню".

Пасол заклікаў больш актыўна пашыраць кантакты азіяцкіх дыпламатычных прадстаўніцтваў у Беларусі, наведваць нашу краіну для выбудоўвання новых сувязей, выкарыстоўваць пляцоўку беларускага пасольства ў Маскве для ўстанаўлення кантактаў з бізнес-місіямі. У якасці нядаўняга прыкладу ён прывёў прэзентацыі, праведзеныя беларускімі арганізацыямі ў Дзелавым і культурным комплексе пасольства для дэлегацыі дзелавых колаў Аб'яднаных Арабскіх Эміратаў.

Уладзімір Сямашка адзначыў, што мерапрыемства такога плана, як сённяшні форум, праходзіць у пасольстве не ўпершыню. "Пляцоўка пасольства Беларусі ў Маскве заўсёды паспяхова задзейнічаецца для выставак, прэзентацый, сустрэч, дзелавых і культурных мерапрыемстваў, на якіх нашы госці з Расіі і многіх іншых краін могуць больш даведацца пра Рэспубліку Беларусь. Гэта і прэзентацыі эканомікі і магчымасцей супрацоўніцтва з удзелам кожнага з рэгіёнаў Беларусі, прэзентацыі турыстычнага, адукацыйнага і навуковага патэнцыялу, індустрыяльнага парка "Вялікі камень", культурных праектаў", - дадаў ён.

Мэта форуму - прэзентацыя экспартнага патэнцыялу Беларусі, устанаўленне прафесійных кантактаў і адкрыты абмен думкамі аб гандлёва-эканамічным супрацоўніцтве Беларусі з краінамі Азіі і яго перспектывы. У мерапрыемстве ўдзельнічалі прадстаўнікі пасольстваў дзяржаў Азіі ў Расіі і ў Беларусі па сумяшчальніцтве. Размова пра краіны, якія не маюць сваіх дыпламатычных прадстаўніцтваў у Мінску і дзе няма беларускіх загранустаноў. Гэта паслы, кіраўнікі дыпмісій і іншыя дыпламаты Інданезіі, Емена, Камбоджы, Малайзіі, Шры-Ланкі, М'янмы, Непала, Сінгапура, Тайланда, Афганістана, Лаоса, Філіпін.

Прадстаўнікам азіяцкага рэгіёна расказалі пра магчымасці супрацоўніцтва з прамысловымі прадпрыемствамі Беларусі, экспартнае фінансаванне сумесных праектаў і патэнцыял нашай краіны ў галіне сельскай гаспадаркі, пра ролю Беларускай гандлёва-прамысловай палаты ў развіцці ўзаемадзеяння з партнёрамі на азіяцкім рынку.

версія для друку

зрабіць стартавай

дабавіць у выбранае