Падзеі

Сергяенка прыняў удзел у парадзе да 80-годдзя Жнівеньскай рэвалюцыі і Дня Незалежнасці В'етнама

Ігар Сергяенка і То Лам. Фота Палаты прадстаўнікоў

2 верасня, Мінск /Кар. БЕЛТА/. Старшыня Палаты прадстаўнікоў Нацыянальнага сходу Ігар Сергяенка сёння па даручэнні Прэзідэнта Аляксандра Лукашэнкі ў якасці ганаровага госця прыняў удзел у парадзе з выпадку 80-годдзя Жнівеньскай рэвалюцыі і Дня Незалежнасці Сацыялістычнай Рэспублікі В'етнам. Аб гэтым БЕЛТА паведамілі ў прэс-службе Палаты прадстаўнікоў.

Парад, які адбыўся ў Ханоі, стаў буйнейшым за апошнія дзесяцігоддзі. Вуліцы сталіцы В'етнама запоўнілі дзясяткі тысяч людзей са сцягамі.

На парадзе была прадэманстравана самая сучасная ваенная тэхніка, уключаючы танкі, ракеты, верталёты і рэактыўныя знішчальнікі. У калонах прайшлі тысячы в'етнамскіх салдат, а таксама ваеннаслужачыя з Кітая, Расіі і іншых краін. В'етнамскі флот прайшоў строем у глыбакаводным заліве Камрань.

"Мы непахісныя ў сваім імкненні абараняць незалежнасць, свабоду, суверэнітэт і тэрытарыяльную цэласнасць нашай Радзімы аж да кожнага свяшчэннага кавалачка зямлі", - заявіў Генеральны сакратар Цэнтральнага камітэта Камуністычнай партыі В'етнама То Лам на адкрыцці парада на плошчы Ба Дзінь, дзе 2 верасня 1945 года абвясціў гістарычную дэкларацыю незалежнасці Хо Шы Мін. Тады было аб'яўлена аб поспеху Жнівеньскай рэвалюцыі, вызваленні ад японскай акупацыі і амаль стагадовага каланіяльнага панавання Францыі, а таксама аб стварэнні дэмакратычнай рэспублікі.

Старшыня Палаты прадстаўнікоў Нацыянальнага сходу Ігар Сергяенка ад імя дэпутатаў усклаў вянок да маўзалея Хо Шы Міна ў Ханоі.

Маўзалей Хо Шы Міна ўяўляе сабой двухпавярховае збудаванне з шэрага мармуру, на другім паверсе якога знаходзіцца празрысты саркафаг з целам першага Прэзідэнта В'етнама. Пры ўваходзе ў маўзалей на мармуровай пліце выбіта яго знакамітая фраза: "Няма нічога даражэй за незалежнасць і свабоду". Ля ўвахода - кругласутачная ганаровая варта.

Наведванне маўзалея - абавязковы пункт праграм візітаў замежных дэлегацый. На плошчы Бадзінь, дзе знаходзіцца маўзалей, праводзяцца парады, урачыстыя шэсці, іншыя мерапрыемствы з нагоды знамянальных дат. Спраектаваны і пабудаваны маўзалей пры садзейнічанні савецкіх спецыялістаў.

версія для друку

зрабіць стартавай

дабавіць у выбранае