Падзеі

Селіверстаў: усе сацыяльныя абавязацельствы па зарплатах і пенсіях будуць выкананы безумоўна

Фота з архiва

25 жніўня, Мінск /Кар. БЕЛТА/. Усе сацыяльныя абавязацельствы перад людзьмі, якія датычацца выплат заработнай платы ў бюджэтнай сферы і пенсій, будуць безумоўна выкананы. Аб гэтым заявіў сёння журналістам міністр фінансаў Юрый Селіверстаў, перадае карэспандэнт БЕЛТА.

Аб зарплатах і пенсіях

Паводле слоў міністра, пэўны недабор даходаў у рэспубліканскім бюджэце стварае некаторыя цяжкасці ў фінансаванні расходаў. "Гэта даволі вялікія цяжкасці з пункту гледжання папярэдніх гадоў. Але з улікам таго, што ў нас ёсць пэўны аб'ём астаткаў, які мы сфарміравалі ў папярэднія гады, усе сацыяльныя абавязацельствы мы выплацім. Што датычыцца заработнай платы, падтрымкі фонду сацыяльнай абароны па пенсіях - тут усё будзе рэалізавана", - сказаў Юрый Селіверстаў.

Разам з тым ён адзначыў, што дзяржава аптымізуе свае расходы, ад некаторых з іх адмовіцца. "Але гэта не закране абавязацельствы. Усе абавязацельствы перад людзьмі па заработнай плаце і іншыя будуць выкананы безумоўна", - яшчэ раз падкрэсліў міністр.

Аб рэспубліканскім і мясцовых бюджэтах

Закранаючы выкананне рэспубліканскага бюджэту, Юрый Селіверстаў канстатаваў наяўнасць пэўных праблем. Яны, растлумачыў кіраўнік Мінфіна, звязаны са зніжэннем паступленняў ад вялікіх прадпрыемстваў, на дзейнасць якіх паўплывала закрыццё рынкаў на фоне пандэміі. У пачатку года былі пэўныя пытанні і з пастаўкамі нафтапрадуктаў. "Недабор даходаў у цэлым па рэспубліканскім бюджэце чакаецца каля трох-чатырох мільярдаў рублёў. Што датычыцца мясцовых бюджэтаў, яны выконваюцца стабільна. Калі параўноўваць з мінулым годам, за сем месяцаў працэнт паступлення даходаў такі ж. Гэта нядрэнна, таму што асноўныя сацыяльныя абавязацельствы - выплата зарплаты, утрыманне сацыяльных устаноў - фінансуюцца з мясцовых бюджэтаў. Сітуацыя нам цалкам зразумелая і кіруемая", - звярнуў ён увагу.

Аб знешнім дзярждоўгу і рынку знешніх пазык

Плацяжы па валютным дзярждоўгу ў гэтым годзе складаюць каля $3,6 млрд, прычым $2 млрд дзяржава ўжо выплаціла. "Мы ў пачатку года рэфінансавалі частку доўгу. Яшчэ ў нас ёсць у прапрацоўцы здзелкі, у тым ліку з расійскімі банкамі тут. Таму мы бачым, што ў поўным аб'ёме ўсе гэтыя плацяжы мы ажыццявім", - сказаў Юрый Селіверстаў.

Каменціруючы пэўную турбулентнасць на рынку замежных пазык адносна Беларусі, міністр адзначыў, што там заўсёды ў той ці іншы перыяд прысутнічалі ваганні. "Недзе стаўкі павышаюцца, недзе зніжаюцца, недзе інвестары хочуць прадаць гэтыя каштоўныя паперы. З улікам таго, што гэтыя пазыкі даволі "доўгія", я думаю, што ўсё гэта вернецца ў нармальнае рэчышча. У нас былі факты, калі на працягу дня цана пазык рэзка расла, потым рэзка спадала, - дадаў ён. - Я не думаю, што сённяшняя сітуацыя будзе захоўвацца на працягу асабліва доўгага перыяду".

Аб курсах валют

Гаворачы аб ваганнях на валютным рынку і іх уплыве на дзяржбюджэт, Юрый Селіверстаў звярнуў увагу, што на гэту сітуацыю можна глядзець з двух бакоў. "Выплаты, якія прывязаны да долара, будуць крыху павялічвацца. Што ж датычыцца даходаў ад такіх, напрыклад, экспарцёраў, як "Беларуськалій", яны, наадварот, будуць прырастаць", - растлумачыў міністр. Ён дадаў, што Беларусь ужо ўнесла асноўную частку ўзносаў у статутныя фонды міжнародных арганізацый, і на гэтыя расходы ваганні на валютным рынку значна не паўплываюць.

"Разумеючы нашу наяўнасць золатавалютных рэзерваў, тое, што мы разлічваемся па даўгах, нейкіх эканамічных рызык, што ўся гэта сітуацыя неяк зменіцца, тут няма. Але з пункту гледжання ўплыву на бюджэт, вядома, будзе", - рэзюмаваў кіраўнік Мінфіна.

версія для друку

зрабіць стартавай

дабавіць у выбранае