Падзеі

Рыжанкоў: закрыццё граніцы з Беларуссю ў першую чаргу накіравана супраць самой жа Польшчы

12 верасня, Мінск /Кар. БЕЛТА/. Беларусь спакойна рэагуе на закрыццё Польшчай граніцы. Гэта адзначыў у інтэрв'ю Першаму інфармацыйнаму тэлеканалу міністр замежных спраў Максім Рыжанкоў, паведамляе БЕЛТА.

"Мы рэагуем спакойна. На самай справе тое, што робіць сёння Польшча, у першую чаргу накіравана супраць самой жа Польшчы", - сказаў міністр.

Максім Рыжанкоў прадоўжыў: "Уласна кажучы, яны свайго шмат у чым дабіліся. Вы бачыце, як Брусель выдзеліў ім адразу амаль 50 млрд еўра на абарону ад гэтых "ордаў" з усходу беларуска-расійскіх... Гэта значыць цяпер мы разумеем, для чаго ўсё гэта было арганізавана, для чаго гэтыя бразганні зброяй на граніцы, вялізныя агароджы, гэта ўзмацненне канфрантацыі, рыторыка ўсіх сродкаў масавай інфармацыі еўрапейскіх, што Польшча - апошні бастыён".

"Вось цяпер атрымалі грошы, пачнецца, прабачце, "распілоўванне" гэтых грошай. Мы ж ведаем, як гэта ўсё адбываецца", - заўважыў ён.

Міністр лічыць характэрным удзел ва ўсёй гэтай гісторыі Бруселя: "Мы сёння ведаем, хто кіруе, якія цягнуцца шлейфы за гэтымі кіраўнікамі па асваенні грошай па іншых праектах - процідзеянні кавіду і гэтак далей".

"Таму сёння ўсё стала на свае месцы, сёння ўсё зразумела", - рэзюмаваў міністр замежных спраў.

версія для друку

зрабіць стартавай

дабавіць у выбранае