Падзеі

Прэзідэнту Беларусі прапанавалі тры групы мер па ўзмацненні барацьбы з неабгрунтаваным пасрэдніцтвам

12 сакавіка, Мінск /Кар. БЕЛТА/. Прэзідэнту Беларусі Аляксандру Лукашэнку прапанавалі тры групы мер па ўзмацненні барацьбы з неабгрунтаваным пасрэдніцтвам. З адпаведным дакладам на нарадзе ў кіраўніка дзяржавы па выключэнні неабгрунтаванага і нядобрасумленнага пасрэдніцтва выступіў намеснік Старшыні Усебеларускага народнага сходу Аляксандр Косінец, перадае карэспандэнт БЕЛТА.

Раней Аляксандру Косінцу было даручана разам з групай спецыялістаў вывучыць адпаведныя пытанні і ўнесці прапановы па ўдасканаленні заканадаўства. "Міністэрствы і ведамствы, аблвыканкамы ўнеслі прапановы. Гэтыя прапановы намі сістэматызаваны. Дадаткова да ўжо існуючых у дзяржаве мер прапануецца рэалізаваць тры групы мер", - далажыў ён.

Першая група - гэта прававыя меры. Найбольш запатрабаваным Аляксандр Косінец назваў унясенне змяненняў у заканадаўства, якое рэгулюе дзяржаўныя закупкі і закупкі за кошт уласных сродкаў у частцы ўніфікацыі і спрашчэння працэдур такіх закупак.

Другая група - арганізацыйныя меры. Да іх ліку адносяцца цэнтралізацыя закупак тавараў, стварэнне каталога тавараў для мэт ажыццяўлення закупак з абавязковым уключэннем усёй наменклатуры тавараў, а таксама стварэнне рэестра нядобрасумленных пасрэднікаў.

"У нас на сённяшні дзень не ў поўным аб'ёме гэта ёсць. А існуючы каталог устарэў", - адзначыў Аляксандр Косінец.

Ён прапанаваў скарыстацца існуючым замежным вопытам і стварыць пры Міністэрстве эканомікі Нацыянальны цэнтр закупак. Гэта структура, лічыць намеснік Старшыні УНС, дасць магчымасць ажыццяўляць вядзенне ўжо згаданага каталога з улікам яго рэгулярнага абнаўлення, метадалагічнае суправаджэнне, растлумачэнне падыходаў да працэсаў закупак, курыраваць адпаведныя электронныя пляцоўкі і г.д.

Трэцяя група - фінансава-эканамічныя меры. "Найважнейшая з якіх - распрацоўка механізма рэалізацыі тавараў ад вытворцаў арганізацыям, якія маюць пратэрмінаваную завінавачанасць. У тым ліку на ўмовах адтэрміноўкі і растэрміноўкі плацяжоў", - сказаў Аляксандр Косінец.

На аснове абагульнення ўсіх значных прапаноў падрыхтаваны праект указа Прэзідэнта Беларусі. Дакумент датычыцца мер па барацьбе з нядобрасумленным і неабгрунтаваным пасрэдніцтвам.

"Я вельмі вас прасіў і папярэджваю яшчэ раз: ніякіх лішніх "засядалавак"! Сабраліся тут, дамовіліся і наперад, дзейнічайце!" - папярэдзіў Прэзідэнт.