Падзеі

Прэзідэнт Ірана прыбыў з афіцыйным візітам у Беларусь

20 жніўня, Мінск /Кар. БЕЛТА/. Прэзідэнт Ірана Масуд Пезешкіян прыбыў з афіцыйным візітам у Беларусь. Самалёт кіраўніка дзяржавы прызямліўся ў Нацыянальным аэрапорце Мінск, перадае карэспандэнт БЕЛТА.

Каля трапа самалёта Прэзідэнта Ірана сустракалі міністр прамысловасці Беларусі, сустаршыня беларуска-іранскай камісіі па эканамічным супрацоўніцтве Андрэй Кузняцоў, першы намеснік міністра замежных спраў Сяргей Лукашэвіч, пасол Беларусі ў Іране Дзмітрый Кальцоў і кіраўнік іранскай дыпмісіі Санеі Алірэза.

Як паведамілі ў прэс-службе Прэзідэнта Беларусі, Аляксандр Лукашэнка 20 жніўня правядзе перагаворы з Масудам Пезешкіянам. Сустрэча кіраўнікоў дзяржаў пройдзе ў Палацы Незалежнасці ў вузкім і пашыраным фарматах, пасля чаго адбудзецца падпісанне двухбаковых дакументаў, накіраваных на пашырэнне партнёрства паміж дзвюма краінамі.

Прэзідэнты, як плануецца, абмяркуюць супрацоўніцтва Беларусі і Ірана ў сферах гандлю, інвестыцый і прамысловай кааперацыі, рэалізацыю сумесных ініцыятыў у навуцы, тэхналогіях, адукацыі, а таксама ўзаемадзеянне дзяржаў у рамках міжнародных структур, у тым ліку ЕАЭС, ШАС, БРІКС, ААН. У цэнтры ўвагі будуць і пытанні забеспячэння рэгіянальнай і міжнароднай бяспекі.

Першапачаткова чакалася, што Масуд Пезешкіян наведае Мінск, прыняўшы ўдзел у пасяджэнні Вышэйшага Еўразійскага эканамічнага савета, якое адбылося ў беларускай сталіцы ў канцы чэрвеня. Аднак з-за абвастрэння канфлікту з Ізраілем візіт Прэзідэнта Ірана быў перанесены, а яго выступленне на саміце ЕАЭС прагучала ў запісе.

У пачатку года Беларусь і Іран правялі 17-е пасяджэнне міжурадавай камісіі па эканамічным супрацоўніцтве. "Мы зацікаўлены не проста ў пастаўках беларускіх тавараў, у сельскагаспадарчым машынабудаванні (трактары, камбайны, прычапное, навясное абсталяванне), але мы сур'ёзна разглядаем іранскія пляцоўкі і іранскіх партнёраў у частцы арганізацыі і перадачы кампетэнцый па вырабе ўжо там, на месцы, навукаёмістых прадуктаў, напрыклад у сельгасмашынабудаванні", - расказаў журналістам на палях сустрэчы Аляксандр Яфімаў, які займаў тады пасаду міністра прамысловасці.

Таму перспектыў у беларуска-іранскага супрацоўніцтва сапраўды шмат. У свой час візіт Аляксандра Лукашэнкі ў Тэгеран назвалі пераломным момантам і зыходным пунктам для пабудовы больш глыбокіх адносін паміж дзвюма дзяржавамі. Маючыя адбыцца перагаворы ў Мінску таксама абяцаюць канкрэтныя вынікі.

версія для друку

зрабіць стартавай

дабавіць у выбранае