Падзеі

11 снежня, Мінск /Кар. БЕЛТА/. РНПЦ медыцынскіх тэхналогій, інфарматызацыі, кіравання і эканомікі аховы здароўя сумесна з Міністэрствам аховы здароўя падрыхтаваў праект Стратэгіі развіцця аховы здароўя Беларусі да 2040 года. Такая інфармацыя размешчана на сайце Міністэрства аховы здароўя са спасылкай на начальніка аддзела навукі міністэрства Васіля Філанюка, паведамляе БЕЛТА.

Стратэгія прызначана комплексна, грунтуючыся на навукова абгрунтаваных прапановах, падысці да вырашэння выяўленых праблем і садзейнічаць рэалізацыі адзінай дзяржаўнай палітыкі, накіраванай на захаванне і ўмацаванне здароўя і павышэнне якасці жыцця грамадзян.

Мэта стратэгіі - павышэнне эфектыўнасці функцыянавання сістэмы аховы здароўя. Гэтага плануецца дасягнуць шляхам паляпшэння якасці і даступнасці медыцынскай дапамогі для шырокіх слаёў насельніцтва, эфектыўнага выкарыстання фінансавых, матэрыяльных і кадравых рэсурсаў галіны. Размова ідзе і аб узмацненні прафілактычнай накіраванасці аховы здароўя пры шырокім уключэнні насельніцтва і грамадскіх арганізацый у фарміраванне здаровага ладу жыцця.

Сярод прыярытэтных напрамкаў развіцця галіны да 2040 года таксама стварэнне інавацыйнай мадэлі медыцынскай навукі, развіццё фармацэўтычнай прамысловасці і ўдасканаленне сістэмы рэгулявання абарачэння лекавых сродкаў.

Стратэгію плануецца рэалізаваць у тры этапы: да 2020, 2030 і 2040 года.

Праект Стратэгіі развіцця аховы здароўя Беларусі да 2040 года будзе абмяркоўвацца на секцыі "Медыцына і фармацыя" II З'езда вучоных Беларусі, які адбудзецца 12-13 снежня ў Мінску.