Падзеі

Павышэнне прэстыжу медперсаналу, удасканаленне работы паліклінік. Якія яшчэ задачы стаяць перад аховай здароўя?

21 студзеня, Мінск /Кар. БЕЛТА/. Удасканаленне аказання амбулаторна-паліклінічнай дапамогі, рацыянальнае размеркаванне абсталявання, матэрыяльных, фінансавых рэсурсаў, аптымальная пабудова сеткі медыцынскіх устаноў і павышэнне прэстыжу спецыяльнасці медыцынскіх работнікаў - на гэтых напрамках акцэнтавала ўвагу намеснік прэм'ер-міністра Наталля Пяткевіч у час сумеснага пасяджэння дзвюх палат беларускага парламента, перадае карэспандэнт БЕЛТА.

Віцэ-прэм'ер звярнула ўвагу на тое, што на функцыянаванне аховы здароўя выдзяляюцца істотныя грашовыя сродкі. Узровень фінансавання ў Беларусі - каля 5 працэнтаў ВУП, і гэта даволі высокі паказчык. У краінах СНД ён на ўзроўні прыкладна 3-5 працэнтаў. Пры гэтым Наталля Пяткевіч падкрэсліла, што ў названыя 5 працэнтаў ВУП уключаны толькі сродкі дзяржаўнага бюджэту без, напрыклад, сродкаў страхавой медыцыны, якія заўсёды ўлічваюцца ў паказчыках фінансавання ў ЗША, краінах Заходняй Еўропы. Яна таксама адзначыла, што мінімальны нарматыў бюджэтнай забяспечанасці расходаў на ахову здароўя ў разліку на аднаго жыхара ў цэлым па краіне за пяцігадовы перыяд вырас больш як у два разы.

"Глабальная мэта, якая абазначана ў дзяржаўнай праграме "Здароўе нацыі" на бягучую пяцігодку, - гэта павышэнне (сярэдняй. - Заўвага БЕЛТА) працягласці жыцця да 76,5 года. Сёння гэта 75,1 года", - адзначыла Наталля Пяткевіч, заўважыўшы, што гэта вельмі сур'ёзная мэта.

Таму ўрад сканцэнтраваўся на некалькіх прыярытэтных напрамках, разумеючы, што па ўсіх пытаннях сістэма аховы здароўя будзе працаваць і развівацца як звычайна. Тым не менш у якасці прыярытэтаў вызначана ўдасканаленне аказання амбулаторна-паліклінічнай дапамогі, якая дасць магчымасць займацца раннім выяўленнем захворванняў, дыягностыкай і маршрутызацыяй пацыентаў.

Высокія медыцынскія тэхналогіі - раўнамерна па ўсёй краіне

Яшчэ адным прыярытэтам віцэ-прэм'ер назвала прадастаўленне высокатэхналагічнай дапамогі насельніцтву, прычым незалежна ад тэрытарыяльнага размяшчэння жыхароў. Наталля Пяткевіч нагадала аб патрабаванні кіраўніка дзяржавы аб раўнамерным развіцці ўсіх тэрыторый. У краіне ўжо ідуць па гэтым шляху. У якасці пацвярджэння сваіх слоў яна прывяла прыклад: сёння 80 працэнтаў кардыяхірургічных умяшанняў праводзіцца ў рэгіянальных кардыяхірургічных цэнтрах.

У якасці прыярытэту яна таксама назвала рацыянальнае размеркаванне абсталявання, матэрыяльных, фінансавых рэсурсаў, аптымальную пабудову сістэмы, сеткі медыцынскіх устаноў і павышэнне прэстыжу спецыяльнасці медыцынскіх работнікаў.

"Разумею, што над прадухіленнем і лячэннем усіх відаў захворванняў сістэма аховы здароўя будзе працаваць. Тым не менш мы вызначылі тры асноўныя тэмы з улікам аналізу захваральнасці і смяротнасці, як зніжэнне захворванняў і смяротнасці ад хвароб сістэмы кровазвароту, анкалагічных захворванняў і цукровага дыябету. Па гэтых напрамках будуць распрацаваны асобныя дзяржаўныя праграмы", - сказала яна.

Дыспансерызацыя і скрынінг

Будзе прадоўжана дыспансерызацыя насельніцтва, ахоп якой павінен быць на ўзроўні не менш як 95 працэнтаў. Вельмі важным напрамкам для аховы здароўя, асабліва ў кантэксце дэмаграфічнай сітуацыі, намеснік прэм'ер-міністра назвала ранняе выяўленне цяжкіх генетычных захворванняў, прыроджаных парокаў развіцця ў плода і нованароджанага. Таму самая сур'ёзная ўвага ўдзяляецца генетычнаму скрынінгу як цяжарных, так і нованароджаных.

Наталля Пяткевіч заўважыла, што некалі праграма скрынінгу нованароджаных пачыналася з пяці захворванняў, сёння іх 12, а да 2030 года стаіць задача выйсці на 36 захворванняў у рамках скрынінгу. Яна падкрэсліла, што за гэтымі паказчыкамі стаіць і вялікая навуковая прафесійная работа.

Віцэ-прэм'ер асобна спынілася на тэме эндапратэзавання буйных суставаў. Паводле яе слоў, за мінулы год план па гэтым напрамку быў выкананы, у залежнасці ад віду сустава, на 120-140 працэнтаў, што дало магчымасць зняць праблему чэргаў. Сёння гэтыя ўмяшанні ажыццяўляюцца ва ўсіх рэгіёнах краіны ў 47 установах. Наталля Пяткевіч падкрэсліла, што для выканання гэтых аперацыяў не трэба прыязджаць у Мінск. У рэгіёнах ёсць дастатковая колькасць устаноў і прафесіяналаў, якія гэтым займаюцца.

Перасовачныя ФАПы

Намеснік прэм'ер-міністра гаварыла і аб важнасці перасовачных фельчарска-акушэрскіх пунктаў (ФАПаў) у сельскай мясцовасці. Сёння ў краіне налічваецца 129 перасовачных ФАПаў, гэты вопыт становіцца запатрабаваным і ў шэрагу замежных краін, якія заказваюць беларускія перасовачныя ФАПы на базе шасі МАЗ.

Віцэ-прэм'ер упэўнена, што высокатэхналагічнае абсталяванне павінна быць рацыянальна размеркавана і эфектыўна задзейнічана. На ім павінны працаваць адпаведныя спецыялісты. "Таму паслугі па абследаванні на такім абсталяванні павінны аказвацца ў арганізацыях адпаведнага - высокага - узроўню. Як правіла, гэта міжраённыя, абласныя і рэспубліканскія (цэнтры. - Заўвага БЕЛТА). Для вырашэння гэтых пытанняў - размяшчэння вузкіх спецыялістаў, высокатэхналагічнага абсталявання - ствараюцца міжраённыя цэнтры. Сёння іх 16, у бліжэйшыя два гады будзе створана яшчэ два. А наогул, задача - не менш за тры ў кожным абласным цэнтры", - адзначыла Наталля Пяткевіч.

Прадаўжаючы тэму забяспечанасці высокатэхналагічным абсталяваннем, яна расказала, што сёння ў краіне ёсць 173 КТ, 75 МРТ, 60 ангіяграфічных апаратаў. Прычым 71 працэнт гэтай тэхнікі размешчаны ў рэгіёнах.

Гаворачы пра сетку медыцынскіх устаноў, Наталля Пяткевіч паведаміла, што ў бліжэйшую пяцігодку запланаваны ўзвядзенне і рэканструкцыя шэрага ўстаноў і аб'ектаў. Так, будзе пабудавана і рэканструявана 106 устаноў аховы здароўя і 26 аб'ектаў дзіцячых аздараўленчых цэнтраў, якія змогуць прыняць больш як 55 тыс. дзяцей.

Правільная маршрутызацыя пацыентаў

Віцэ-прэм'ер адзначыла, што ва ўмовах рознаўзроўневай сістэмы аказання медыцынскай дапамогі важна правільна выбудоўваць маршрутызацыю пацыентаў у залежнасці ад складанасці захворвання і цяжкасці стану. Гэта пытанне, паводле яе слоў, пачынаецца з самага нізавога - паліклінічнага - звяна, калі ўрач агульнай практыкі павінен правільна накіраваць або да вузкага спецыяліста, або на абследаванне з дапамогай высокатэхналагічнага абсталявання. "На ўзроўні Міністэрства аховы здароўя, упраўленняў аховы здароўя маршрутызацыя прапісана. Цяпер галоўная задача - усё гэта выбудаваць. І як толькі будзе зроблена, вельмі многія праблемы вырашацца", - упэўнена Наталля Пяткевіч.

Яна дадала, што ў залежнасці ад рэгіёна і апарата час чакання ў чарзе на абследаванне можа складаць ад аднаго да трох месяцаў, недзе - 7-14 дзён. "Мы ставім перад сабой задачу выйсці на тое, каб для ўсяго абсталявання, якое ёсць у краіне, чарга была не больш за 30 дзён", - сказала віцэ-прэм'ер, адзначыўшы ролю лічбавізацыі ў гэтым працэсе.