Падзеі

Новы прэс-сакратар у МЗС Беларусі. Расказваем, што аб ім вядома

Фота з архiва

2 красавіка, Мінск /Кар. БЕЛТА/. Новы прэс-сакратар назначаны ў МЗС Беларусі. Ім стаў Руслан Варанкоў - дыпламат з больш як 15-гадовым стажам у сістэме беларускага знешнепалітычнага ведамства, паведамляе БЕЛТА.

"Дыпламат з вялікім вопытам і ўражальным паслужным спісам", - так яго прадставілі журналістам у прэс-службе МЗС.

Папярэдні прэс-сакратар Анатоль Глаз, як паведамлялася, быў назначаны паслом Беларусі ў Турцыі.

Да нядаўняга часу Руслан Варанкоў працаваў генеральным консулам Беларусі ў в'етнамскім Хашыміне. На гэту пасаду ён быў назначаны ў красавіку 2022 года, як вынікае з інфармацыі на сайце генконсульства.

Раней новы прэс-сакратар займаў пасаду намесніка начальніка ўпраўлення Азіі, Аўстраліі і Акіяніі Міністэрства замежных спраў, ажыццяўляючы каардынацыю ўсяго комплексу адносін з гэтымі рэгіёнамі.

Ён таксама працаваў саветнікам і юрысконсультам у Пастаянным прадстаўніцтве Беларусі пры ААН у Нью-Ёрку, адказваючы за юрыдычныя і бюджэтныя пытанні, а таксама за барацьбу з тэрарызмам і актывізацыю Генеральнай Асамблеі ААН. Кіраваў некалькімі напрамкамі перагавораў у Шостым камітэце ГА ААН і ў самой ГА. Быў выбраны старшынёй Спецыяльнага камітэта па Статуце Арганізацыі Аб'яднаных Нацый і ўзмацненні ролі Арганізацыі.

Партфоліа Руслана Варанкова ўключае работу на розных пасадах у галоўным дагаворна-прававым упраўленні, галоўным консульскім упраўленні МЗС Беларусі і пасольстве Беларусі ў ЗША.

Новы прэс-сакратар з'яўляецца кар'ерным дыпламатам: паступіў на дыпламатычную службу Беларусі ў 2008 годзе. Да гэтага на працягу нядоўгага часу працаваў у Міністэрстве юстыцыі Беларусі, адказваў за прававую экспертызу міжнародных дагавораў. Вывучаў міжнароднае права ў Беларускім дзяржаўным універсітэце. Валодае англійскай і французскай мовамі.-0-

версія для друку

зрабіць стартавай

дабавіць у выбранае