Падзеі

Наступнае пасяджэнне Еўразійскага міжурадавага савета пройдзе ў Мінску

7 жніўня, Мінск /Кар. БЕЛТА/. Наступнае пасяджэнне Еўразійскага міжурадавага савета пройдзе ў Мінску. Аб гэтым паведаміў прэм'ер-міністр Беларусі Аляксандр Турчын у час пасяджэння Еўразійскага міжурадавага савета ў пашыраным складзе, якое праходзіць у Чалпон-Аце (Кыргызстан), перадае карэспандэнт БЕЛТА.

"Тэму глыбокага супрацоўніцтва ў галіне прамысловасці мы зможам прадоўжыць у час маючай адбыцца міжнароднай выстаўкі "ІНАПРАМ. Беларусь", якая пройдзе з 30 верасня па 2 кастрычніка бягучага года ў Мінску адначасова з чарговым пасяджэннем Еўразійскага міжурадавага савета", - сказаў Аляксандр Турчын.

Ён выказаў пажаданне, каб еўразійскія кааперацыйныя праекты былі інавацыйнымі, высокатэхналагічнымі, грунтаваліся на лічбавых рашэннях. "Такім чынам, трэба даць зялёнае святло супрацоўніцтву ў навукова-тэхнічнай сферы. Ёсць меркаванне, што ЕАЭС мае строга эканамічнае мэтавызначэнне. Аднак у цяперашніх умовах імклівага развіцця без магутнага навуковага суправаджэння дзяржава асуджана на татальнае адставанне. Адназначна нам патрэбны калектыўныя інструменты, якія стымулююць правядзенне НДДКР (навукова-даследчых і доследна-канструктарскіх работ. - Заўвага БЕЛТА) і забяспечваюць доступ да перадавых тэхналогій", - адзначыў прэм'ер-міністр.

версія для друку

зрабіць стартавай

дабавіць у выбранае