Падзеі

На тэрыторыі Беларусі прайшоў абмен ваеннапалоннымі паміж Расіяй і Украінай

26 чэрвеня, Гомельскі раён /Кар. БЕЛТА/. На тэрыторыі Беларусі адбыўся чарговы абмен ваеннапалоннымі паміж Расіяй і Украінай, перадае карэспандэнт БЕЛТА.

Беларусь прадаўжае выконваць сваю гуманітарную місію і чарговы раз выступіла пляцоўкай для абмену ваеннапалоннымі. Расія і Украіна перадалі па 160 чалавек. Беларускі бок арганізаваў і выбудаваў неабходны лагістычны ланцужок - ад месца пасадкі самалёта ў аэрапорце Гомеля, маршруту калоны аўтобусаў у пункт пропуску "Новая Гута", дзе адбыўся абмен, да гарачага харчавання і медыцынскай дапамогі.

Адзін з расійскіх ваеннаслужачых прызнаўся, што як толькі ўбачыў надпіс "Рэспубліка Беларусь" на ўездзе ў нашу краіну, яго перапоўнілі эмоцыі. "Пачуцці, эмоцыі перапаўняюць... Сустрэлі вельмі цёпла", - сказаў ён.

Калі мужчына даведаўся, што едзе на абмен, то шчасцю і радасці не было канца. "Эмоцыі перапаўняюць, калі дадому прыязджаеш праз год. Год не бачыў нікога", - ледзь стрымаў слязу ён. Мужчына зрабіў і першы званок дадому. "Мяне ўсе чакаюць. Жонка гаворыць, што ведала яшчэ ўчора, што я прыеду. Дачка плача, рада, што прыеду", - дадаў Раман.

Як адзначыла старшыня Пастаяннай камісіі па працы і сацыяльных пытаннях Палаты прадстаўнікоў Ірына Касцевіч, сёння чарговы раз быў адкрыты гуманітарны калідор, які дазволіў вырашыць лёсы 160 ваеннапалонных з кожнага боку. "Пляцоўка Беларусі - гэта бяспека. І на гэтай пляцоўцы - людзі, якія па адзін і па другі бок, ваеннапалонныя. Страціўшыя надзею, тут, на беларускай зямлі, яны спадзяюцца і вераць, што ўсё атрымаецца", - сказала яна.

Ірына Касцевіч падкрэсліла, што гэта пляцоўка давала не толькі шанц на жыццё, але і сустракала рэфрыжэратары з целамі загінулых. "Гэта (абмен загінулымі. - Заўвага БЕЛТА) таксама трэба рабіць, таму што блізкім важна па-чалавечы пахаваць на радзіме", - сказала яна.

"Вельмі прыемна, калі чуеш словы ўдзячнасці і ад расійскіх, і ад украінскіх ваеннапалонных. Сапраўды, мы стараемся стварыць, можа, і мінімальны камфорт, але тут укладзена душа. Душа беларусаў, нашага Прэзідэнта, яго шчырасць, дабрыня, нацэленасць на мір і хутчэйшае вырашэнне гэтага канфлікту", - дадала яна.

"Нашы аўтобусы перавозяць ваеннапалонных, арганізавана гарачае харчаванне. "Дзякуй, беларусы... да слёз", - гэтыя словы дарагога варты", - падкрэсліла Ірына Касцевіч.

Яна таксама зрабіла акцэнт на тым, што гэта пляцоўка дае магчымасць выбудаваць і дыялог. "Дазваляе, можа, і не вырашыць канфлікт, але дапамагае задумацца, дзеля чаго трэба забяспечыць мір. Мір патрэбны для таго, каб захаваць жыццё, - дадала яна. - Мы, беларусы, заўсёды нацэлены на мір. Наш мірны характар, любоў да людзей і чалавечнасць даюць магчымасць вырашаць гэтыя складаныя пытанні. Беларусь нацэлена максімальна аказваць дапамогу, калі ў нас ёсць патрэба".

Упаўнаважаны па правах чалавека ў Расійскай Федэрацыі Яна Лантратава расказала, што ў сённяшніх перагаворах з яе калегам з украінскага боку Дзмітрыем Лубінцом размова ішла аб тым, што трэба як мага часцей ажыццяўляць абмены ваеннапалоннымі. "І самае галоўнае, гуманітарныя акцыі па ўз'яднанні сем'яў і вяртанні цывільных людзей. Магу сказаць, што ў бліжэйшыя дні адбудзецца вельмі важны для нас гуманітарны абмен, мы плануем яшчэ раз тут сустрэцца", - агучыла планы Яна Лантратава.

"Мы вельмі ўдзячны беларускім калегам, таму што сапраўды арганізавана ўсё на вышэйшым узроўні. Тут ёсць магчымасць правесці перагаворы, абмяняцца дакументамі. Акрамя таго, усе хлопцы і з боку Украіны, і з боку Расіі накормлены. Ім перадаюцца пасылкі, яны маюць магчымасць тут пераадзецца. Вялікі дзякуй беларускім калегам за бездакорную арганізацыю працэсу. Так гавару я як расійскі бок, так гаворыць украінскі бок, і мы на ўсіх сваіх пляцоўках гэта паўтараем", - падкрэсліла ўпаўнаважаны па правах чалавека ў Расійскай Федэрацыі.

У гэты дзень не змог стрымаць слёз расійскі ваеннаслужачы Артур. "Маме, усім скажы, каб не перажывалі. Усё нармальна. Жывы. Цалую", - гэта першая за доўгі час размова з дачкой стала для мужчыны самай эмацыянальнай. Паводле яго слоў, дапамагалі трымацца, не здавацца думкі пра жонку і дзяцей, брата. "Найперш паеду да родных сваіх, да дачок. Маці ў мяне хварэе. Хачу яе ўбачыць - не ведаю, жывая ці не жывая", - перажывае расійскі ваеннаслужачы. "А сённяшнія слёзы на вачах - гэта слёзы радасці. Усім хутчэйшага вяртання дадому", - пажадаў ён.

Пачуў адразу пасля працэдуры абмену родныя галасы ў трубцы тэлефона яшчэ адзін расійскі ваеннаслужачы Сяргей. "Я ў Беларусі. Усё нармальна, добра. Люблю вас. Цалую", - сказаў ён сям'і, якую не бачыў 10 месяцаў.

"Мы ў Беларусі ўжо, а я яшчэ не ўсведамляю, што сюды прыехалі. Калі даведаўся, што буду вяртацца дадому, быў шок. Жонка сказала, што таксама ў шоку. Яна ўвесь час спадзявалася, чакала. І мне надзея сустрэць сям'ю таксама дапамагала жыць. Дома жонка, дзеці. Гэта самае галоўнае. А дзеля чаго яшчэ жыць?" – задаў рытарычнае пытанне Сяргей.

"Хочацца сказаць вялікі дзякуй беларускаму боку за цёплы прыём, што накармілі. Быў вельмі прыемна здзіўлены станам дарог (у Беларусі. - Заўвага БЕЛТА), атмасферай", - падзяліўся адзін з вызваленых з палону ўкраінскіх ваеннаслужачых. Гаворачы аб тым, што дапамагала жыць яму ўвесь гэты час, ён прызнаўся: вера і жаданне вярнуцца дадому. "Разуменне таго, што мы маем патрэбу ў сем'ях, а сем'і маюць патрэбу ў нас. Вельмі хацелася вярнуцца дадому. Большасць людзей чакала гэты момант (абмен. - Заўвага БЕЛТА) і верыла, што ён адбудзецца. Рады, што апошнім часам пайшлі абмены больш-менш масавыя", - сказаў ён.

Другі ўкраінскі ваеннаслужачы прызнаўся, што яму маральна дапамагалі весткі з дому - ад жонкі і ўжо дарослай дачкі, якой у кастрычніку споўніцца 19 гадоў. На пытанне, што ён зробіць перш за ўсё, вярнуўшыся дадому, адказаў: "Скажу дзякуй вялікі сваёй жонцы. За тое, што яна на свае жаночыя плечы ўзваліла (я трапіў у палон 12 красавіка 2022 года) клопат пра наш дом, даглядала бацькоў. Я ўдзячны ёй за тое, што яна зрабіла". "Хачу, каб наступнае пакаленне, мая дачка раслі ў міры. Гэта мая мара", - дадаў украінскі ваеннаслужачы.

Працэс суправаджаюць брыгады хуткай медыцынскай дапамогі, каб аператыўна вырашыць праблему ў выпадку неабходнасці. "У ходзе медыцынскага забеспячэння мы аказваем усю неабходную медыцынскую дапамогу - ад збору анамнезу да інструментальнага абследавання, якое ўключае зняцце кардыяграмы, вымярэнне глюкаметрыі. Пры неабходнасці гатовы аказаць меддапамогу ў поўным памеры, уключаючы і падключэнне да крыніцы ШВЛ, а таксама ўвесь спектр электрадэфібрыляцыі", - расказаў фельчар брыгады хуткай медыцынскай дапамогі Гомеля, псіхолаг Кірыл Юзянкоў.

"Мы гатовы заўсёды да ўсяго. У спектр нашай дапамогі ўваходзіць псіхалагічнае, медыцынскае суправаджэнне. Наша галоўная задача - каб пацыент даехаў з пункта А ў пункт Б у добрым стане, каб гэты стан быў стабільны. Гатовы аказаць усю неабходную дапамогу, якая патрабуецца ад нас", - падкрэсліў ён.

Наладжаны алгарытм дзеянняў і для сітуацый, калі раптам экстранна патрабуецца шпіталізацыя. "Увесь спектр медыцынскіх паслуг аказваецца спачатку на дашпітальным этапе, пры неабходнасці гатовы аказаць дапамогу і транспартаваць пацыентаў у больш шырокі напрамак, што ўключае стацыянарнае лячэнне, аддзяленне анестэзіялогіі і рэанімацыі ў тым ліку", - дадаў Кірыл Юзянкоў.

Усяго на тэрыторыі Беларусі прайшло ўжо больш за 70 абменаў ваеннапалоннымі і загінулымі.