Падзеі

МЗС парэкамендавала беларусам праяўляць асцярожнасць пры пошуку работы за мяжой

Фота з архiва

12 жніўня, Мінск /Кар. БЕЛТА/. Міністэрства замежных спраў рэкамендуе грамадзянам праяўляць асцярожнасць пры пошуку работы за мяжой. Знешнепалітычнае ведамства Беларусі выступіла з такой рэкамендацыяй пасля з'яўлення ў СМІ інфармацыі пра беларусаў, вызваленых з працоўнага рабства ў Іспаніі, паведамляе БЕЛТА.

"Пасольства Беларусі ў Мадрыдзе знаходзіцца ў кантакце з праваахоўнымі органамі Іспаніі. Пры пацвярджэнні даных СМІ і неабходнасці беларусам будзе аказана ўсебаковая консульска-прававая дапамога. МЗС Беларусі ў сваю чаргу чарговы раз рэкамендуе грамадзянам праяўляць асцярожнасць пры пошуку работы за мяжой, правяраць звесткі пра работадаўца і ўмовы працаўладкавання", - звярнулі ўвагу ў міністэрстве.

У ведамстве падкрэслілі, што пасольства і консульства Беларусі гатовы аказваць дапамогу і падтрымку беларусам, якія апынуліся ў складанай сітуацыі за мяжой.

"У кожнай краіне акрэдытацыі нашых дыпмісій дзейнічае тэлефон экстраннай сувязі для грамадзян Рэспублікі Беларусь. Перад любой паездкай за мяжу, незалежна ад яе мэт, раім удакладніць размяшчэнне бліжэйшага пасольства або консульства Беларусі і захаваць іх кантактныя даныя, каб у выпадку неабходнасці аператыўна звязацца з дыпламатамі", - парэкамендавалі ў МЗС.

У міністэрстве адзначылі, што адказная падрыхтоўка да паездкі і веданне, куды звярнуцца за дапамогай, - залог бяспечных падарожжаў і вяртання на радзіму.

Раней у СМІ з'явілася інфармацыя аб тым, што грамадзянская гвардыя і Служба мытнага кантролю Іспаніі ліквідавалі злачынную арганізацыю, якая займалася вытворчасцю і распаўсюджваннем кантрафактнай і кантрабанднай тытунёвай прадукцыі ў правінцыях Малага, Кордава і Севілья. Паведамлялася, што ў выніку аперацыі вызвалены 18 чалавек розных нацыянальнасцей, уключаючы грамадзян Беларусі, Кітая і В'етнама, якіх прымушалі працаваць у нечалавечых умовах.

версія для друку

зрабіць стартавай

дабавіць у выбранае