Падзеі

МЗС: беларускі бок прыме рашэнне па фурах з літоўскай рэгістрацыяй і праінфармуе партнёраў

Фота з архiва

17 сакавіка, Мінск /Кар. БЕЛТА/. Беларускі бок прыме рашэнне па фурах з літоўскай рэгістрацыяй і праінфармуе партнёраў з Літвы і Польшчы. Аб гэтым заявіў намеснік міністра замежных спраў Ігар Сякрэта па выніках сустрэчы прэм'ер-міністра Беларусі Аляксандра Турчына з літоўскімі і польскімі перавозчыкамі, перадае карэспандэнт БЕЛТА.

Літоўскія і польскія аўтаперавозчыкі звярнуліся да Прэзідэнта Беларусі з просьбай садзейнічаць урэгуляванню сітуацыі з грузавікамі з літоўскай рэгістрацыяй. Замежныя перавозчыкі фактычна кінуты на волю лёсу сваімі ўрадамі. З-за палітычна матываваных рашэнняў уласных улад, уключаючы абмежаванні на транзіт і закрыццё пунктаў пропуску, каля тысячы грузавікоў з літоўскай рэгістрацыяй аказаліся заблакіраваны і пазбаўлены магчымасці паўнацэнна працаваць на прывычных напрамках. Прэзідэнт Беларусі разгледзеў іх зварот і, кіруючыся гуманітарнымі прычынамі, даручыў прэм'ер-міністру сустрэцца з аўтаперавозчыкамі і выслухаць іх пазіцыю.

"Мы выслухалі ўважліва тых, хто хацеў выказацца. У кожнага прадпрымальніка свая сітуацыя, свая колькасць транспарту, рухомага саставу. Нам было цікава гэта пачуць, таму што ў нас няма афіцыйнага канала камунікацыі з Вільнюсам, атрымаць рэлевантную інфармацыю мы не змаглі. Таму было прынята рашэнне разгледзець, усебакова вывучыць звароты і прыняць гэтых людзей для таго, каб самім даведацца, якая сітуацыя. Безумоўна, беларускія эксплуатуючыя арганізацыі, на стаянках якіх знаходзяцца транспартныя сродкі, счэпы, прычэпы, паўпрычэпы, панеслі пэўныя затраты. Гэтыя затраты неабходна будзе кампенсаваць. Рашэнне, якім будзе памер аплаты, як яна будзе выстаўляцца, будзе прынята пасля таго, як будзе падрыхтаваны даклад, - сказаў Ігар Сякрэта. - Ва ўстаноўленым парадку будуць прыняты рашэнні, аб якіх мы праінфармуем нашых партнёраў з Літвы і Польшчы".

Намеснік міністра замежных спраў паведаміў, што з самага пачатку сітуацыі, якая ўзнікла чатыры месяцы таму, рабілася шмат спроб вырашыць гэту праблему палітыка-дыпламатычнымі спосабамі. "Была зроблена незлічоная колькасць спроб выйсці на сувязь з літоўскім бокам. Прычым не толькі па лініі Мінск - Вільнюс, але таксама ў ходзе знаходжання на міжнародных пляцоўках мы дакладна падавалі сігнал, што гатовы да размовы, абмену думкамі. Але чамусьці Вільнюс разглядаў і разглядае любыя кантакты на палітычным узроўні як уласнае паражэнне", - адзначыў ён.

версія для друку

зрабіць стартавай

дабавіць у выбранае