Падзеі

МЗС Беларусі пракаменціравала рашэнне Суда ЕС аб адхіленні апеляцыі "Гродна Азота"

Фота з архiва

8 ліпеня, Мінск /Кар. БЕЛТА/. Рашэнне Суда Еўрапейскага саюза, які 3 ліпеня адхіліў апеляцыю ААТ "Гродна Азот" і яго філіяла "Завод Хімвалакно" ў сувязі з накладзенымі на беларускія прадпрыемствы санкцыямі ЕС, хоць і выклікае глыбокае расчараванне, з'яўляецца даволі прадказальным. З такой заявай выступіла Міністэрства замежных спраў Беларусі, паведамляе БЕЛТА.

"Гэта рашэнне чарговы раз развеяла актыўна навязваемы міф аб справядлівасці і аб'ектыўнасці еўрапейскай судовай сістэмы. Вяршэнства закону і абарона дэмакратычных каштоўнасцей у ЕС на справе з'яўляюцца не больш чым дэкларацыяй. А як жа праславуты так званы "светапарадак, заснаваны на правілах"? Любому непрадузятаму спецыялісту ў прававой галіне відавочна, што санкцыйны рэжым Еўрапейскага саюза не толькі прымяняецца з грубым парушэннем Статута ААН, але і складзены такім чынам, што, па сутнасці, можа быць выкарыстаны ў адносінах да любой юрыдычнай або фізічнай асобы без належных прававых падстаў", - падкрэсліў прэс-сакратар МЗС Руслан Варанкоў.

У міністэрстве адзначылі, што ў выпадку з беларускімі прадпрыемствамі так званымі "дастатковымі падставамі" з'яўляюцца сама толькі дзяржаўная форма ўласнасці і выплата падаткаў у бюджэт.

"Ці не абсурд? Па меры штампавання санкцыйных пакетаў і вынясення судовых рашэнняў еўрапейская бюракратыя не спрабуе выканаць нават знешнія правілы юрыдычнай прыстойнасці, уключаючы прэзумпцыю невінаватасці і дастатковасць доказаў. Тут жа не лішнім будзе згадаць, што беларускім юрыдычным асобам заблакіравана права на атрыманне кваліфікаванага юрыдычнага кансультавання ў ЕС, іншай неабходнай прававой дапамогі", - сказаў Руслан Варанкоў.

Ён заявіў, што выбарачнае прымяненне ў Еўрапейскім саюзе прававых норм, двайныя стандарты і непразрыстыя працэсы ствараюць атмасферу недаверу і нігілізму ў адносінах да так гучна дэкларуемых еўрапейскіх каштоўнасцей.

"Аднак, здаецца, што шукаць саломінку ў чужым воку, не заўважаючы бервяна ў сваім уласным, ужо стала аблюбаваным заняткам асобных нашых еўрапейскіх партнёраў. Заклікаем Еўрапейскі саюз адмовіцца нарэшце ад згубнай практыкі выкарыстання незаконных абмежавальных мер, якія з'яўляюцца выключна інструментамі нядобрасумленнай канкурэнцыі і палітычнага націску", - дадаў прэс-сакратар.

версія для друку

зрабіць стартавай

дабавіць у выбранае