Падзеі
МЗС Беларусі асудзіла дзеянні, якія вядуць да напружання абстаноўкі ў Карыбскім басейне
Фота з архiва
27 жніўня, Мінск /Кар. БЕЛТА/. Міністэрства замежных спраў Беларусі рашуча асуджае любыя агрэсіўныя дзеянні, накіраваныя на стварэнне напружанай міжнароднай абстаноўкі ў Карыбскім басейне і Лацінскай Амерыцы ў цэлым. Аб гэтым гаворыцца ў заяве беларускага знешнепалітычнага ведамства, паведамляе БЕЛТА.
"Беларусь нязменна выступае за міжнароднае супрацоўніцтва ў барацьбе з наркатрафікам. Разам з тым лічым недапушчальнымі бяздоказныя і палітычна матываваныя абвінавачанні ў адрас суверэнных дзяржаў, у прыватнасці Баліварыянскай Рэспублікі Венесуэла і яе кіраўніцтва, у падтрымцы тэрарызму і незаконнага абароту наркотыкаў", - гаворыцца ў заяве.
МЗС Беларусі заклікала ўсе бакі строга кіравацца палажэннямі Статута ААН, перш за ўсё прынцыпамі адмовы ад пагрозы сілай або яе прымянення, а таксама неўмяшання ва ўнутраныя справы дзяржаў. У беларускім знешнепалітычным ведамстве выказалі ўпэўненасць, што любыя супярэчнасці павінны вырашацца выключна мірнымі сродкамі шляхам дыялогу, без прымянення ваеннай сілы і націску.
"Рэспубліка Беларусь пацвярджае падтрымку законна выбранаму Прэзідэнту Баліварыянскай Рэспублікі Венесуэла Нікаласу Мадуру і ўраду краіны, паслядоўна выступаючы за захаванне яе суверэнітэту, незалежнасці і стабільнасці", - сказана ў заяве.
19 жніўня агенцтва Reuters, спасылаючыся на крыніцы ў Пентагоне, праінфармавала, што тры эсмінцы ВМС ЗША былі накіраваны ў паўднёвую частку Карыбскага басейна да берагоў Венесуэлы "для правядзення аперацый у барацьбе з наркакартэлямі". Таксама паведамлялася аб перакідцы ракетнага крэйсера USS Lake Erie і атамнай падводнай лодкі USS Newport News. Паводле даных тэлеканала CNN, у рэгіёне будуць задзейнічаны амаль 4 тыс. амерыканскіх ваенных.
Прэзідэнт Венесуэлы Нікалас Мадура ў адказ на ўзмацненне ваеннай прысутнасці ЗША ў Карыбскім басейне аб'явіў усенародную мабілізацыю ў Баліварыянскую нацыянальную міліцыю.
версія для друку
зрабіць стартавай
дабавіць у выбранае