Падзеі
МЗС: Беларусі ў 2025 годзе ўдалося забяспечыць устойлівасць знешнепалітычнага курсу
11 сакавіка, Мінск /Кар. БЕЛТА/. Беларусі ўдалося забяспечыць устойлівасць знешнепалітычнага курсу. Важнасць гэтага адзначыў міністр замежных спраў Максім Рыжанкоў на калегіі па выніках работы МЗС у 2025 годзе, якая праходзіць з удзелам прэм'ер-міністра Аляксандра Турчына, перадае карэспандэнт БЕЛТА.
"Знешнепалітычны фон вакол Беларусі ў 2025 годзе заставаўся няпростым, аднак нам удалося забяспечыць устойлівасць знешнепалітычнага курсу. Беларусь застаецца адкрытай да ўсебаковага развіцця адносін з усімі, хто гатовы да дыялогу на прынцыпах роўнасці, узаемнай павагі і ўліку нацыянальных інтарэсаў адзін аднаго", - падкрэсліў міністр.
Падводзячы вынікі работы за справаздачны перыяд, ён вылучыў ключавыя аспекты, якія вызначылі беларускі парадак дня.
"Нашым безумоўным прыярытэтам заставалася ўмацаванне стратэгічнага партнёрства з Расійскай Федэрацыяй, якое ў 2025 годзе выйшла на беспрэцэдэнтны ўзровень. Ключавым дасягненнем года стала паспяховая рэалізацыя пакета інтэграцыйных мер, якія далі магчымасць нарасціць узаемны тавараабарот да рэкордных $55 млрд і забяспечыць надзейную абарону нашых граніц у рамках абноўленай стратэгіі бяспекі Саюзнай дзяржавы", - звярнуў увагу Максім Рыжанкоў.
Ён таксама сказаў аб тым, што рэзультатыўнае старшынства Беларусі ў органах Еўразійскага эканамічнага саюза ў 2025 годзе дало магчымасць надаць аб'яднанню новы імпульс.
"Завершана рэалізацыя стратэгіі-2025, зацверджаны план рэалізацыі дэкларацыі "Еўразійскі эканамічны шлях", значна ўмацаваны міжнародны аўтарытэт Еўразійскага эканамічнага саюза, - прадоўжыў кіраўнік беларускага знешнепалітычнага ведамства. - Дасягненні нашага саюза былі прадстаўлены на галоўных пляцоўках ААН у Нью-Ёрку і Жэневе".
Міністр таксама адзначыў: "Падпісанне пагадненняў з Манголіяй, ААЭ і Інданезіяй, а таксама правядзенне ў Мінску маштабнага Еўразійскага эканамічнага форуму з удзелам дэлегацый з 33 краін пацвердзілі статус ЕАЭС як аднаго з вядучых цэнтраў сілы ў шматпалярным свеце".
Ён таксама заўважыў, што дынамічна развіваецца супрацоўніцтва з дзяржавамі СНД, у першую чаргу з Узбекістанам і Азербайджанам.
Акрамя асноўнага даклада кіраўніка МЗС на пасяджэнні будуць заслуханы выступленні шэрага паслоў, міністраў прамысловасці і эканомікі, а таксама дырэктара Нацыянальнага агенцтва па турызме з улікам важнасці гэтай тэмы. Акрамя таго, плануецца выступленне кіраўніцтва Аршанскага льнокамбіната.
На мерапрыемства запрошаны кіраўнікі галіновых рэспубліканскіх органаў дзяржаўнага кіравання, канцэрнаў, Нацыянальнага банка, Белстата, абласных выканаўчых камітэтаў і Мінгарвыканкама.
Вынікі пасяджэння падвядзе прэм'ер-міністр, які таксама зробіць акцэнт на задачах на 2026 год.
версія для друку
зрабіць стартавай
дабавіць у выбранае