Падзеі

Міжнародныя кантакты і заканатворчасць. Сергяенка расказаў аб рабоце дэпутацкага корпуса

9 верасня, Мінск /Кар. БЕЛТА/. Як дэпутаты пашыраюць беларускі парадак дня і адстойваюць нацыянальныя інтарэсы, у праекце "Размова ў Прэзідэнта" на "Беларусь 1" расказаў старшыня Палаты прадстаўнікоў Нацыянальнага сходу Ігар Сергяенка пасля даклада кіраўніку дзяржавы, паведамляе БЕЛТА.

Заканатворчасць і работа з грамадзянамі

"Высокая ацэнка кіраўніка дзяржавы да многага абавязвае дэпутацкі корпус. У сваёй рабоце мы павінны прыбавіць", - адзначыў Ігар Сергяенка.

Паводле яго слоў, цяпер завяршаецца падрыхтоўка да адкрыцця чарговай сесіі Палаты прадстаўнікоў. "У партфелі ў нас 21 законапраект. Зусім розныя напрамкі. Іх можна класіфікаваць па наступных блоках: нацыянальная бяспека і праваахоўная дзейнасць, сацыяльна-эканамічны блок, пытанні міжнароднага характару. Было яшчэ раз вызначана, што дэпутаты, працуючы ў акругах, размаўляючы са сваімі выбаршчыкамі, прымаючы грамадзян, удзельнічаючы у мерапрыемствах, павінны вывучаць грамадскую думку, бачыць тыя праблемы, якія сёння хвалююць грамадства, фарміраваць незалежны погляд", - сказаў Ігар Сергяенка, дадаўшы, што дэпутаты прытрымліваюцца такіх падыходаў на сістэмнай аснове.

На папярэдняй сесіі прынята 64 законапраекты. Значная іх частка датычылася пытанняў сацыяльнай абароны насельніцтва, эканомікі, адукацыйнай сферы, праваахоўнай дзейнасці і інш.

"Прэзідэнт звярнуў увагу, каб мы часцей запрашалі спецыялістаў міністэрстваў, ведамстваў, якія адказваюць за канкрэтны напрамак (не толькі кіраўнікоў), каб разам знаходзіць у працэсе дыскусій рашэнні", - сказаў Ігар Сергяенка.

Будзе прадоўжана і практыка выязных семінараў для вывучэння правапрымяняльнай практыкі, прыёмаў грамадзян.

Народная дыпламатыя

У міжнароднай дзейнасці прыярытэт аддаецца ўзаемадзеянню ў рамках Парламенцкага сходу Саюза Беларусі і Расіі ў пытаннях сацыяльна-эканамічнага развіцця краін, выраўноўвання правоў грамадзян, правядзення патрыятычных мерапрыемстваў з акцэнтам на моладзі. У прыклад ён прывёў праведзены гэтымі днямі ў Магілёве маладзёжны форум Саюзнай дзяржавы.

"Таксама працуем актыўна на такіх пляцоўках, як Парламенцкая асамблея АДКБ, Міжпарламенцкая асамблея СНД сумесна з Саветам Рэспублікі. Працуем з еўрапейскімі партнёрамі, дэпутатамі ў рамках Парламенцкай асамблеі АБСЕ, узначальваем групу "Еўразія" ў гэтым годзе ў рамках Міжпарламенцкага саюза. Развіваем кантакты ў міждзяржаўных парламенцкіх аб'яднаннях, атрымалі статус наглядальніка ў Панафрыканскім парламенце, у Азіяцкай парламенцкай асамблеі. У бліжэйшы час станем наглядальнікамі ў Арабскім парламенце. Гэта дае магчымасць не проста развіваць кантакты, але і выступаць на гэтых пляцоўках", - адзначыў Ігар Сергяенка.

Паспяхова прайшла камандзіроўка ў В'етнам, дзе па даручэнні Прэзідэнта Аляксандра Лукашэнкі ў якасці ганаровага госця Ігар Сергяенка прыняў удзел у парадзе з нагоды 80-годдзя Жнівеньскай рэвалюцыі і Дня Незалежнасці рэспублікі. У тым ліку адпрацоўваліся эканамічныя пытанні, падпісаны пагадненні аб пастаўках беларускай прадукцыі.

"Мы стараемся ва ўсіх такіх паездках знаходзіць сваю нішу, развіваючы кантакты шляхам народнай дыпламатыі", - адзначыў Ігар Сергяенка.

Ён нагадаў, што ў Палаце прадстаўнікоў Нацыянальнага сходу створаны групы дружбы з канкрэтнымі краінамі і рэгіёнамі. У бліжэйшы час рыхтуецца візіт парламентарыяў з Алжыра. Нядаўна ў Беларусі прымалі дэпутатаў з Інданезіі. Таксама чакаюць у бліжэйшы час з візітамі дэпутатаў з Турцыі, В'етнама.

Захаванне гістарычнай памяці

Адзін з напрамкаў дзейнасці Палаты прадстаўнікоў Нацыянальнага сходу - работа па захаванні гістарычнай памяці. Па ініцыятыве дэпутатаў прайшоў цыкл сустрэч ваенна-патрыятычнага характару ў ВНУ краіны, адбыліся парламенцкія чытанні на розных пляцоўках. Была выдадзена друкаваная прадукцыя.

Адзін з перспектыўных праектаў, які абмяркоўваўся ў Магілёве на маладзёжным форуме Саюзнай дзяржавы, - стварэнне пастаянна дзеючага маладзёжнага цэнтра патрыятычнага выхавання ў Бабруйску на базе крэпасці, якой ужо звыш 200 гадоў, з прыцягненнем сродкаў рэспубліканскага, абласнога бюджэтаў, бюджэту Саюзнай дзяржавы. Гэта ініцыятыва Магілёўскага аблвыканкама падтрымана. "Чакаецца сур'ёзная рэканструкцыя. Гэта вялікі праект", - расказаў Ігар Сергяенка.

версія для друку

зрабіць стартавай

дабавіць у выбранае