Падзеі

МУС: у бягучым годзе разгледжана 4075 зваротаў аб прыёме ў беларускае грамадзянства

Фота з архiва

8 лістапада, Мінск /Кар. БЕЛТА/. У бягучым годзе разгледжана 4075 зваротаў аб прыёме ў беларускае грамадзянства. Аб гэтым БЕЛТА паведамілі ў Міністэрстве ўнутраных спраў.

Штогод тысячы іншаземцаў хадайнічаюць аб прыёме ў беларускае грамадзянства. Паводле інфармацыі МУС, у гэтым годзе ўжо разгледжана 4075 такіх дакументаў. У асноўным гэта звароты ўкраінцаў. 2811 жыхароў Украіны звярталіся за беларускім грамадзянствам. З агульнай колькасці станоўчае рашэнне прынята па 3997 іншаземцах.

Органы ўнутраных спраў разглядаюць звароты ў самыя кароткія тэрміны, а ў шэрагу выпадкаў робяць гэта і ў спрошчаным парадку. У МУС падкрэслілі, што ўсё гэта з'яўляецца пацвярджэннем адкрытасці нашай рэспублікі для законапаслухмяных і працавітых людзей. Такая палітыка на працягу многіх гадоў застаецца нязменнай і паспяхова рэалізуецца.

"Тым, хто выказвае жаданне стаць часткай нашага грамадства, неабходна пастаянна пражываць у Беларусі на працягу пяці гадоў, мець легальную крыніцу існавання, выконваць палажэнні Канстытуцыі і заканадаўства, - адзначыў начальнік Дэпартамента грамадзянства і міграцыі МУС Аляксей Бягун. - Кожны пункт абавязковы да выканання. Напрыклад, прыцягненне да адміністрацыйнай адказнасці тры і больш разоў стане падставай для адмовы ў задавальненні хадайніцтва аб прыёме ў грамадзянства".

версія для друку

зрабіць стартавай

дабавіць у выбранае