Падзеі

Міхаіл Жураўкоў з 12 па 14 жніўня знаходзіцца ў Бразіліі з візітам. Адбылася яго сустрэча з міністрам адукацыі Федэратыўнай Рэспублікі Бразілія Рэнату Жаніне Рыбейру.

У падпісаным у Бразіліі пагадненні адзначана, што у мэтах развіцця супрацоўніцтва бакі будуць імкнуцца аказваць садзейнічанне ўстанаўленню і развіццю прамых сувязей паміж установамі адукацыі, абмену педагагічнымі работнікамі з ліку прафесарска-выкладчыцкага складу, студэнтамі, магістрантамі і аспірантамі, прыёму грамадзян Бразіліі ў беларускія ўстановы для атрымання вышэйшай, паслявузаўскай адукацыі. Бакі маюць намер садзейнічаць і ўзаемнаму ўдзелу навучэнцаў абедзвюх дзяржаў у адукацыйных мерапрыемствах, абмену вучэбна-метадычнай дакументацыяй, вучэбнымі выданнямі, інфармацыйна-аналітычнымі і іншымі матэрыяламі, уключаючы інфармацыю аб розных аспектах адукацыйнай дзейнасці.

Як адзначылі ў прэс-цэнтры, у час сустрэчы з міністрам адукацыі Бразіліі Міхаіл Жураўкоў звярнуў увагу бразільскага боку на зацікаўленасць развіваць супрацоўніцтва па некалькіх напрамках. Сярод іх падрыхтоўка, перападрыхтоўка спецыялістаў і навуковых кадраў ва ўстановах адукацыі і навуковых арганізацыях Беларусі. У міністэрстве зрабілі акцэнт на тым, што беларускія ВНУ маюць значны навуковы патэнцыял. Гэта важныя цэнтры навукова-інавацыйнай дзейнасці. Пры гэтым навуковае супрацоўніцтва ажыццяўляецца з замежнымі партнёрамі з 58 краін па больш як 700 дагаворах.

Прыярытэт у прапануемых праграмах абмену і навучання аддаецца падрыхтоўцы спецыялістаў для прадпрыемстваў машынабудавання, энергетыкі, у тым ліку атамнай, будаўніцтва і архітэктуры, аховы здароўя, сельскай гаспадаркі, сферы інфармацыйных тэхналогій. Установы вышэйшай адукацыі (УВА) Беларусі маюць магчымасць арганізаваць падрыхтоўку спецыялістаў для ўсіх галін эканомікі краіны. БДУ, БДУІР і медыцынскія УВА забяспечваюць (у поўным аб'ёме або часткова) атрыманне адукацыі на англійскай мове. Больш таго, БНТУ і БДУІР рыхтуюць спецыялістаў, выкарыстоўваючы дыстанцыйную форму.

Таксама міністр адукацыі правёў перагаворы са старшынёй WorldSkills International Сайманам Бартлі. Сёння Міхаіл Жураўкоў прымае ўдзел у Міжнароднай канферэнцыі міністраў адукацыі "Ініцыятывы ХХІ стагоддзя, накіраваныя на садзейнічанне прафесійнай адукацыі і навучанню".