29 сакавіка, Мінск /Кар. БЕЛТА/. Мемарандум аб узаемаразуменні маюць намер падпісаць Міністэрства культуры Беларусі і Міністэрства спадчыны і культуры Султаната Аман у сферы спадчыны і культуры, паведамілі БЕЛТА ў ведамстве.
Як плануецца, падпісанне дакумента адбудзецца ў час афіцыйнага візіту міністра культуры Беларусі Юрыя Бондара ў Султанат Аман па запрашэнні міністра культуры і спадчыны Амана з 31 сакавіка па 3 красавіка. Таксама пройдуць перагаворы з міністрам спадчыны і культуры Амана, членам каралеўскай сям'і Хайсамам бен Тарыкам аль-Саідам.
У склад афіцыйнай дэлегацыі ад Рэспублікі Беларусь уваходзіць генеральны дырэктар Нацыянальнага акадэмічнага Вялікага тэатра оперы і балета Уладзімір Грыдзюшка, які плануе абмеркаваць падпісанне мемарандума аб двухбаковым супрацоўніцтве з Каралеўскім оперным тэатрам Маската.
Нацыянальным гістарычным музеем Беларусі і Нацыянальным музеем Султаната Аман (г.Маскат) падрыхтаваны выставачны праект "Беларусь на скрыжаванні цывілізацый", які пройдзе ў Султанаце Аман з 2 красавіка па 4 ліпеня 2018 года. Сутнасць выстаўкі можна перадаць словамі Прэзідэнта Беларусі, сказанымі ім на цырымоніі адкрыцця ў 2016 годзе саборнай мячэці ў Мінску: "Беларусь здаўна славіцца традыцыямі верацярпімасці і ўзаемнай павагі паміж людзьмі розных канфесій і нацыянальнасцей. У гэтым наша гордасць, наша сіла, у гэтым залог нашай жыццеўстойлівасці. Беларусь - краіна з міралюбівым характарам. Мы цэнім мір і спакой, таму будуем храмы для ўсіх канфесій. Мы прытрымліваемся аднаго лозунга: любы грамадзянін нашай краіны мае права знайсці сваю дарогу да свайго храма, і ніхто не мае права і не павінен яго прымушаць рабіць інакш".
Асноўная ідэя выстаўкі - гістарычная сувязь Беларусі з ісламскім светам. Бесканфліктнае суіснаванне беларусаў з прадстаўнікамі розных мусульманскіх народаў, традыцыйная талерантнасць да ісламу ў Беларусі - усё гэта вельмі важна і каштоўна ў неспакойную эпоху палітычных і сацыяльных канфліктаў ва ўсім свеце, падкрэслілі ў Міністэрстве культуры.