Падзеі

Лукашэнку даложана аб пусках РСЗА "Паланэз-М" і перспектывах мадэрнізацыі комплексу

Фота з архіва "Ваяр"

24 снежня, Мінск /Кар. БЕЛТА/. Прэзідэнту Беларусі Аляксандру Лукашэнку даложана аб праведзеных пусках РСЗА "Паланэз-М" і перспектывах мадэрнізацыі гэтага айчыннага комплексу. Аб гэтым расказаў журналістам міністр абароны Беларусі Віктар Хрэнін, перадае карэспандэнт БЕЛТА.

"Кіраўніку дзяржавы было даложана, што з 1 снежня ва Узброеных Сілах пачаўся новы вучэбны год. І новы вучэбны год ракетчыкі пачалі з пускаў нашага мадэрнізаванага комплексу "Паланэз-М", пускаючы ракеты з павялічанымі далёкасцю і дакладнасцю. Кіраўнік дзяржавы быў праінфармаваны, як прайшлі пускі. Падраздзяленне вярнулася ў пункт пастаяннай дыслакацыі", - сказаў міністр.

У рамках абмеркавання гэтага пытання Аляксандр Лукашэнка пацікавіўся перспектывамі мадэрнізацыі гэтага айчыннага комплексу. Паводле слоў Віктара Хрэніна, размова ў тым ліку ідзе аб сумесных распрацоўках з Расійскай Федэрацыяй ракет яшчэ больш павялічанай далёкасці.

"Дэталёва было даложана, што мы зацікаўлены. Вядома, гэты від узбраення нам патрэбны. І сумесна з нашым ДВПК (Дзяржаўным ваенна-прамысловым камітэтам. - Заўвага БЕЛТА) мы прадоўжым гэту работу па распрацоўцы, мадэрнізацыі нашага комплексу", - адзначыў міністр абароны.

Як паведамлялася БЕЛТА, на другім пасяджэнні VII Усебеларускага народнага сходу Аляксандр Лукашэнка заявіў аб планах у бліжэйшыя гады ўдасканаліць РСЗА "Паланэз": "Сітуацыя вельмі змянілася. Сродкі радыёэлектроннай барацьбы магутнейшыя. Нам трэба гэту ракету абараніць, каб яна была яшчэ больш дакладнай, каб яна ў фортачку залятала, як я некалі гаварыў. У бліжэйшыя гады мы атрымаем больш удасканалены "Паланэз", але мы павінны самі гэта вырабляць. Мы свой "Паланэз" - апошнія варыянты - зрабілі самі. Калі ўмеем рабіць, трэба яго ўдасканаліць. Гэта наша тэма - абараніць ракету ад уздзеяння сродкаў радыёэлектроннай барацьбы".

Акрамя таго, Прэзідэнту было даложана і аб перспектывах паступлення ў войскі сучасных ЗРК "Бук". "На Усебеларускім народным сходзе Прэзідэнт адзначыў яшчэ адну перспектыўную мадэрнізацыю комплексу нашага ракетнага - "Бук". Таксама было даложана, што, як, у якія тэрміны, у якой колькасці гэты комплекс будзе паступаць у нашы Узброеныя Сілы", - адзначыў Віктар Хрэнін.

"Зрабілі "Бук", які сёння па ўсім свеце просяць. Свая ракета, свае ўстаноўкі. Выдатная машына, нам у Беларусі дастаткова", - заявіў Аляксандр Лукашэнка ў нядаўнім Пасланні, якое было агучана на пасяджэнні УНС.

версія для друку

зрабіць стартавай

дабавіць у выбранае