Падзеі

Лукашэнка ўзнагародзіў Прэзідэнта Егіпта ордэнам Дружбы народаў

18 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка ўзнагародзіў сёння Прэзідэнта Егіпта Абдэль Фатаха ас-Сісі ордэнам Дружбы народаў, перадае карэспандэнт БЕЛТА.

Цырымонія ўручэння ўзнагароды егіпецкаму лідару адбылася пасля завяршэння перагавораў кіраўнікоў дзяржаў і падпісання пакета міжнародных дакументаў.

"Беларускія людзі вельмі талерантныя, спакойныя, працавітыя. Яны з вялікай павагай ставяцца да егіпецкага народа. Наша дружба калі і не адносіцца да тых глыбокіх часоў, калі цывілізацыя пачыналася з Егіпта, тым не менш яна мае добрыя карані, - адзначыў Аляксандр Лукашэнка. - У Савецкага Саюза і Егіпта былі заўсёды добрыя адносіны, і мы з вамі наследнікі гэтых добрых традыцый".

Кіраўнік дзяржавы расказаў, што яму давялося працаваць з рознымі лідарамі Егіпта, але сапраўды добрыя, дружалюбныя і цёплыя адносіны паміж краінамі склаліся менавіта ў перыяд прэзідэнцтва Абдэль Фатаха ас-Сісі. "Я хачу вам падзякаваць за тую шчырасць і абавязковасць у нашых адносінах. Мы з вамі заклалі моцны фундамент дружбы паміж нашымі народамі", - падкрэсліў беларускі лідар.

Прэзідэнт Егіпта падзякаваў за ўзнагароду і цёплы прыём усёй дэлегацыі. Ён запэўніў, што егіпецкі бок прыкладзе ўсе намаганні для рэалізацыі дасягнутых дамоўленасцей і намечаных праектаў. "Гэта мой першы візіт у вашу цудоўную рэспубліку, але запэўніваю, што не апошні", - заявіў ён.

Ордэн Дружбы народаў Абдэль Фатаху ас-Сісі ўручаны за значны асабісты ўклад у развіццё двухбаковых адносін паміж Беларуссю і Егіптам, заслугі ў справе ўмацавання міру, кансалідацыі грамадства і яднання народаў.

версія для друку

зрабіць стартавай

дабавіць у выбранае