Падзеі

Лукашэнка раскрыў прычыны змянення параметраў вучэнняў "Захад-2025"

1 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка расказаў аб прычынах рашэння змяніць параметры вучэнняў Узброеных сіл Саюзнай дзяржавы "Захад-2025". Адпаведныя заявы кіраўнік дзяржавы зрабіў на ўрачыстым сходзе з нагоды Дня Незалежнасці, перадае карэспандэнт БЕЛТА.

"Вы ведаеце: у нас пад бокам праводзіцца серыя вучэнняў "Абаронца Еўропы - 2025". Маштаб і блізкасць манеўраў пагражальныя - 25 тыс. ваеннаслужачых НАТА (гэта як яны заявілі) і каля 3 тыс. адзінак узбраенняў і тэхнікі літаральна за 10-15 кіламетраў ад нашай граніцы. Гэта нават  не адлегласць аднаго кідка, гэта ўжо фактычна на нашай зямлі. Мы бачым гэтых "абаронцаў" з наступальным сцэнарыем ва ўсёй красе. І не збіраемся рэагаваць на агрэсіўную дэманстрацыю сілы. Робім усё, каб знізіць напружанасць у рэгіёне", - сказаў кіраўнік дзяржавы.

Паводле слоў Аляксандра Лукашэнкі, таму прынята рашэнне змяніць параметры вучэнняў Узброеных сіл Саюзнай дзяржавы "Захад-2025". "Мы знізілі колькасць войскаў практычна ў два разы, перанеслі месца іх размяшчэння ўглыб сваёй тэрыторыі. Далей ад граніцы на сотні кіламетраў", - заявіў Прэзідэнт.

Аляксандр Лукашэнка расказаў, што гэта пытанне ўзнімалася і на нядаўніх перагаворах з прадстаўнікамі ЗША. "Заклапочаныя амерыканцы на апошніх перагаворах з намі. Я ім адкрыта сказаў: "Мы нічога не хаваем, мы з Прэзідэнтам Расіі абмяркоўвалі гэту тэму. Вы хочаце - вось я вас запрашаю ў Беларусь на гэтыя вучэнні. Калі ласка, глядзіце. Мы ні на каго не збіраемся нападаць".

"Тады чаму крычаць, што вось яны (Расія і Беларусь. - Заўвага БЕЛТА) заўтра нападуць, Еўропу захопяць? Ім (Захаду. - Заўвага БЕЛТА) жа трэба абгрунтаваць сваю палітыку. Таму яны шукаюць ворага. І бачаць гэтага ворага ў нас", - адзначыў кіраўнік дзяржавы.

версія для друку

зрабіць стартавай

дабавіць у выбранае