Падзеі

Лукашэнка расказаў аб запланаванай сустрэчы з Пуціным і працяглай камандзіроўцы за мяжу

Фота з архiва

23 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка расказаў аб запланаванай сустрэчы з Прэзідэнтам Расіі Уладзімірам Пуціным і працяглай камандзіроўцы за мяжу. Асобныя пытанні падрыхтоўкі да паездак абмяркоўваліся ў час даклада кіраўніку дзяржавы прэм'ер-міністра Аляксандра Турчына, перадае карэспандэнт БЕЛТА.

У час размовы згадваліся нядаўнія візіты прэм'ер-міністра ва Узбекістан і Расію. "Вы ж былі ў камандзіроўцы. Як там складваюцца абставіны з нашымі сябрамі?" - пацікавіўся Аляксандр Лукашэнка.

Размова, у прыватнасці, ішла аб перагаворах кіраўнікоў урадаў Беларусі і Расіі. "Вы размаўлялі з Міхаілам Уладзіміравічам Мішусціным (прэм'ер-міністр Расіі. - Заўвага БЕЛТА). Чым завяршылася гэта размова? Гэта вельмі актуальна перад маёй сустрэчай з Прэзідэнтам Расіі, на якой мы, як звычайна, у гэтым плане абмяркоўваем тое, што не вырашана ўрадамі", - сказаў беларускі лідар.

"Ці ёсць такія пытанні? Як іх будзем вырашаць? І праблемныя пытанні (калі яны ёсць) у нашых адносінах", - дадаў Прэзідэнт.

Кіраўнік дзяржавы адзначыў, што ў хуткім часе будзе праходзіць XIII Форум рэгіёнаў Беларусі і Расіі, які на гэты раз арганізаваны ў Мінску і Мінскай вобласці. "Вельмі добрая пляцоўка для абмеркавання не толькі бягучых, але і стратэгічных пытанняў", - ахарактарызаваў гэты форум Прэзідэнт.

"Таму трэба будзе вам гэтым займацца перш за ўсё, паколькі ў мяне тут працяглая камандзіроўка, - арыентаваў прэм'ер-міністра Аляксандр Лукашэнка. - І ў сувязі з гэтай працяглай камандзіроўкай - таксама якія пытанні нам трэба будзе вырашаць. Можа, ёсць прапановы".

версія для друку

зрабіць стартавай

дабавіць у выбранае