Падзеі

Пасяджэнне Савета кіраўнікоў дзяржаў праводзіцца ў вузкім, а затым пашыраным складзе. На парадку дня пасяджэння каля 15 пытанняў. Лідары краін у тым ліку абмяркоўваюць рэалізацыю ў 2017 годзе міждзяржаўнай праграмы "Культурныя сталіцы Садружнасці" ў Азербайджане, праграму супрацоўніцтва ў барацьбе з тэрарызмам і іншымі насільнымі праявамі экстрэмізму на 2017-2019 гады, канвенцыю аб міжрэгіянальным супрацоўніцтве. Асаблівую ўвагу ўдзельнікі пасяджэння звернуць на адаптацыю Садружнасці да сучасных рэалій.

Сустрэчы кіраўнікоў дзяржаў сёння папярэднічала пасяджэнне Савета міністраў замежных спраў (СМЗС) краін - членаў Садружнасці. Падводзячы яго вынікі, старшыня Выканаўчага камітэта СНД Сяргей Лебедзеў падкрэсліў, што ні адзін кіраўнік, старшыня ўрада або іншы афіцыйны прадстаўнік краіны - удзельніцы Садружнасці ні разу не выказаў сумненняў у неабходнасці існавання арганізацыі.

"Усе яны поўнасцю разумеюць і падтрымліваюць неабходнасць захавання і развіцця арганізацыі. Так, патрэбна мадэрнізацыя, так, неабходна правесці яе адаптацыю да сучасных рэалій. Але аб ліквідацыі СНД ніколі размовы не было і не ідзе цяпер", - сказаў ён. У сувязі з гэтым, паводле слоў Сяргея Лебедзева, ён з аптымізмам глядзіць на будучае арганізацыі.