Падзеі

На разгляд Прэзідэнта быў прадстаўлены праект указа "Аб падатковым кансультаванні", які накіраваны на ўкараненне прафесійнага інстытута пасрэднікаў паміж бізнесам і падатковымі органамі. Праект гэтага дакумента ўваходзіць у пакет заканадаўчых актаў, якія рыхтуюцца ў рамках развіцця прадпрымальніцтва і стымулявання дзелавой актыўнасці насельніцтва.

У пачатку сустрэчы Аляксандр Лукашэнка выказаў пэўную насцярожанасць у сувязі з гэтым праектам нарматыўнага прававога акта і папрасіў асаблівую ўвагу звярнуць на экспертызу на прадмет карупцыйных рызык. "У нас ёсць падатковыя інспекцыі, якія так ці інакш нешта падказваюць, кансультуюць, - адзначыў беларускі лідар. - Каб мы не легалізавалі платную дзейнасць вашых падначаленых, і яны за гэта яшчэ будуць грошы браць, а потым забудуць, што людзі дзяржаўныя, што трэба на дзяржаву працаваць. А пойдуць за грошы кансультаваць, яшчэ падштурхоўваць некага, і мы вось такім чынам легалізуем гэту жульніцкую дзейнасць".

"Можа, я не зусім унікнуў у гэта пытанне зыходзячы з праекта ўказа. Але мяне гэты праект указа ў цэлым неяк нават насцярожвае ў тым плане, ці атрымаем мы які-небудзь эфект ад таго, што мы яго ўводзім. А вось негатыўны можам атрымаць. Таму хацелася б, каб вы падрабязна абаранілі гэта пытанне", - дадаў Прэзідэнт.

Сяргей Налівайка па выніках сустрэчы расказаў журналістам, што праект дакумента падтрыманы кіраўніком дзяржавы пасля атрымання дадатковых тлумачэнняў па шэрагу аспектаў, якія выклікалі сумненні і насцярожанасць.

Міністр звярнуў увагу, што дадатковых затрат бюджэтных сродкаў для гэтага новаўвядзення не спатрэбіцца. Прадугледжана, што на першапачатковым этапе метадалагічнае суправаджэнне падатковых кансультантаў будзе ажыццяўляць Міністэрства па падатках і зборах, а ў бліжэйшай перспектыве яно пяройдзе да Палаты падатковых кансультантаў. "Стаць падатковым кансультантам зможа не абавязкова эканаміст. Гэта можа быць і юрыст, і дзеючы бухгалтар, адвакат. Таму нельга гаварыць аб тым, што будзе ўведзена нейкая спецыяльнасць у ВНУ. Іншая справа, што з'яўляецца яшчэ адзін дадатковы канал прафесійнага пасрэдніцтва нараўне з юрыстамі, адвакатамі, аўдытарамі, бухгалтарамі", - расказаў Сяргей Налівайка.

Прадугледжана, што Палата падатковых кансультантаў будзе атэстоўваць гэтых спецыялістаў, перыядычна праводзіць павышэнне іх прафесійнага ўзроўню, узаемадзейнічаць з падатковымі органамі.

Міністр адзначыў, што калі распрацоўвалі прадстаўлены праект указа, у якасці прыкладу выкарыстоўваўся вопыт Германіі. Да распрацоўкі прыцягваліся і міжнародныя эксперты. "У ФРГ яшчэ ў 1961 годзе быў прыняты закон аб падатковым кансультаванні, і на сённяшні дзень каля 90 тыс. фізічных і больш як 7,5 тыс. юрыдычных асоб ажыццяўляюць дзейнасць у якасці падатковых кансультантаў. На наш погляд, гэта спрашчае ўзаемадзеянне суб'ектаў з падатковымі органамі, паляпшае якасць падатковай сістэмы, яе ўспрыманне, - сказаў Сяргей Налівайка. - Падатковая сістэма Германіі як мінімум не лягчэйшая за нашу, але ў немцаў яна абсалютна не выклікае ніякага непрыняцця або абурэння, таму што суб'екты гаспадарання практычна не ўзаемадзейнічаюць з падатковай службай. Гэтым займаюцца прафесійныя пасрэднікі ў асобе падатковых кансультантаў. Думаю, што і мы павінны рухацца па гэтым шляху".

Адказваючы на пытанне карэспандэнта БЕЛТА, ці не будуць падатковыя кансультанты ў тым ліку садзейнічаць ухіленню іх кліентаў ад выплаты падаткаў, Сяргей Налівайка сказаў: "На сённяшні дзень нішто не перашкаджае тое ж самае рабіць аўдытару ці юрысту. І калі гэта ў рамках заканадаўства, то правільная мінімізацыя падатковых плацяжоў абсалютна не крымінальна. Гэта называецца падатковым планаваннем. Іншая справа, каб гэта не было агрэсіўным, з парушэннем законаў. Пашыраць магчымасці для мінімізацыі плацяжоў гэты праект ніяк не дазволіць".

Міністр таксама асабліва падкрэсліў, што ў адпаведнасці з праектам указа на падатковых кансультантаў ускладаецца поўная матэрыяльная адказнасць за якасць і вынік іх дзейнасці, а магчымыя рызыкі нанясення шкоды падлягаюць абавязковаму страхаванню. "Гэта адзін з асноўных аспектаў, што будзе адрозніваць падатковага кансультанта ад аўдытараў і юрыстаў, якія сёння абслугоўваюць суб'екты гаспадарання. Тыя памылкі або недакладнасці, якія ён будзе дапускаць у сваёй дзейнасці, ён будзе пакрываць за кошт сваіх уласных сродкаў. І праектам указа прадугледжана абавязковае страхаванне адказнасці гэтага суб'екта", - растлумачыў Сяргей Налівайка.

Адзначаецца таксама, што зварот да падатковых кансультантаў будзе мець выключна добраахвотны характар і ні ў якім разе не будзе навязвацца прадпрымальнікам і арганізацыям.

Інстытут падатковага кансультавання запатрабаваны і паспяхова функцыянуе ў многіх еўрапейскіх краінах, такіх як Аўстрыя, Германія, Польшча, Францыя, Чэхія і іншых. Яго прымяненне дае магчымасць засцерагчы бізнес ад памылак і парушэнняў падатковага заканадаўства, знізіць карупцыйныя рызыкі ў сферы падаткаабкладання.