Падзеі

Лукашэнка канцэптуальна патрымаў прапанову аб узбуйненні Дрыбінскага раёна

7 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка канцэптуальна падтрымаў прапанову аб узбуйненні Дрыбінскага раёна. Аб гэтым па выніках нарады ў кіраўніка дзяржавы заявіў журналістам старшыня Магілёўскага аблвыканкама Анатоль Ісачанка, перадае карэспандэнт БЕЛТА.

"У ходзе наведвання кіраўніком дзяржавы (Дрыбінскага раёна. - Заўвага БЕЛТА) былі дадзены адпаведныя даручэнні. Мы адпрацавалі, і сёння быў даклад па ўзбуйненні Дрыбінскага раёна. Прэзідэнт падтрымаў нашы прапановы. Раён будзе ўзбуйняцца за кошт Чавускага, Горацкага, Магілёўскага раёнаў, - сказаў кіраўнік аблвыканкама. - Аляксандр Лукашэнка даручыў адпрацаваць нарматыўны прававы акт і далей унесці. Сумесна з урадам яшчэ раз уважліва паглядзім, адпрацуем усе моманты, каб мінімізаваць якія-небудзь праблемы для людзей. Паколькі самае галоўнае ў гэтым - людзі. Таму мы, вядома, будзем дапрацоўваць. Але канцэптуальна нашы прапановы Прэзідэнтам падтрыманы".

Як расказаў Анатоль Ісачанка, у выніку Дрыбінскі раён па памеры стане сярэднестатыстычным у Магілёўскай вобласці. На гэты момант яго плошча складае 76,6 тыс. га, уключаючы 40 тыс. га зямлі. Пасля ўзбуйнення гэта будзе ўжо 96 тыс. га агульнай плошчы разам з 56 тыс. га сельгасугоддзяў.

Змяненні закрануць 27 населеных пунктаў з насельніцтвам каля 960 чалавек. Што датычыцца сацыяльных пытанняў, кіраўнік рэгіёна ўпэўнены, што тут праблем узнікнуць не павінна, бо, паводле дзеючага заканадаўства, ёсць магчымасць выбару, у якой школе навучаць дзяцей або ў якой паліклініцы абслугоўвацца. Таму змена адміністрацыйных межаў на гэтыя пытанні не паўплывае.

У цэлым стаіць задача павысіць эфектыўнасць работы Дрыбінскага раёна і даць штуршок яго развіццю. Цяпер гэты раён па плошчы лічыцца самым маленькім у Беларусі і адным з самых маланаселеных.

Пасля ўзбуйнення на тэрыторыі Дрыбінскага раёна будуць дадаткова ўтвораны новыя суб'екты гаспадарання. Будзе ўжо не тры гаспадаркі, а пяць сельгаспрадпрыемстваў.

"Аграмашсэрвіс" зойдзе і будзе гаспадарыць на зямлі. Прадпрыемства будзе працаваць ужо на тэрыторыі Дрыбінскага раёна, але на землях Чавускага, якія мы перадаём. Ствараем прадпрыемства "Зара-Агра", якое будзе працаваць у Дрыбінскім раёне, але землі будуць Чавускага і Магілёўскага раёнаў. Наша племаб'яднанне, пашырэнне вытворчасці племянных быкоў мясных парод, - мы ім дадаткова выдзяляем да 2 тыс. га зямлі, плюс будаўніцтва комплексу - за кошт зямель Дрыбінскага раёна плюс землі Магілёўскага раёна. "Горацкі элеватар" будзе пашыраць свае плошчы і прысутнасць", - расказаў Анатоль Ісачанка пра маштаб будучых змяненняў.

версія для друку

зрабіць стартавай

дабавіць у выбранае