Падзеі

Лукашэнка: я змагаюся не за калгасы або саўгасы - я змагаюся за вёску

Фота з архiва

7 жніўня, Вілейка /Кар. БЕЛТА/. Прэзідэнт Беларусі Аляксандр Лукашэнка ў час размовы з жыхарамі Вілейскага раёна выказаўся аб неабходнасці захаваць вёску, перадае карэспандэнт БЕЛТА.

У Вілейцы кіраўнік дзяржавы правёў нараду па пытаннях забеспячэння сельскага насельніцтва шырокім асартыментам тавараў пад поўную патрэбнасць. У сувязі з гэтым, размаўляючы з мясцовымі жыхарамі, ён выказаўся аб неабходнасці захаваць вёску.

"Я змагаюся не за калгасы, саўгасы, прыватнікаў. Не за сельскую гаспадарку нават. Я змагаюся за вёску, каб яна захавалася ў якім-небудзь выглядзе", - растлумачыў Аляксандр Лукашэнка.

Прэзідэнт звярнуў увагу на неабходнасць развіваць інфраструктуру ў сельскай мясцовасці, забяспечваючы насельніцтва ўсім неабходным. Адным з крокаў у гэтым напрамку стала стварэнне аграгарадкоў. "Насельніцтва на хутарах жыць ужо не будзе - яно хоча жыць у горадзе (размова пра ўмовы, блізкія да ўмоў пражывання ў гарадской мясцовасці. - Заўвага БЕЛТА). Давайце створым сельскі горад, аграгарадок", - сказаў ён.

Аляксандр Лукашэнка падкрэсліў, што за бягучую пяцігодку будзе пракладзена дарога да кожнага аграгарадка, які яшчэ яе не мае. "План мы ўжо вызначылі, грошы выдзелілі, пачалі будаваць там, дзе не пабудавалі. Але ў асноўным ужо і дарогі ёсць", - канстатаваў беларускі лідар.

Кіраўнік дзяржавы таксама адзначыў, што менавіта пытанні абслугоўвання жыхароў вёскі сталі адной з цэнтральных тэм яго камандзіроўкі ў Вілейскі раён. Ён у ліку іншых быў выбраны для эксперыменту па паляпшэнні гандлёвага абслугоўвання сельскага насельніцтва з удзелам вялікіх сетак. На нарадзе Аляксандр Лукашэнка падкрэсліў: калі такія сеткі хочуць збіраць прыбытак у вялікіх гарадах, яны павінны ўзяць на сябе адказнасць і за аддаленыя вёсачкі.

"Цытую яшчэ раз: у труне кішэняў няма. Калі ты зарабіў, можаш камусьці дапамагчы - дапамажы. Не трэба сабе набіваць кішэні", - сказаў ён.

версія для друку

зрабіць стартавай

дабавіць у выбранае