Падзеі

Лукашэнка арыентуе будаўнічую галіну на значны ўклад у далейшае развіццё Беларусі

Фота з архiва

23 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка арыентуе будаўнічую галіну на значны ўклад у далейшае развіццё краіны. Аб гэтым ён заявіў пры назначэнні Вадзіма Альшэўскага міністрам архітэктуры і будаўніцтва, перадае карэспандэнт БЕЛТА.

"Я хацеў бы, каб міністэрства грунтоўна працавала і заняло сваё дастойнае месца ў сістэме органаў улады ў Беларусі. Вы павінны бачыць і кантраляваць усё, што адбываецца ў галіне будаўніцтва. Тым больш вы ідзяце з вобласці (Вадзім Альшэўскі на пасадзе намесніка старшыні Брэсцкага аблвыканкама курыраваў пытанні будаўніцтва, транспарту і ЖКГ. - Заўвага БЕЛТА), ведаеце сістэму. Я на вас вельмі разлічваю. Таму што ёсць будаўніцтва - развіваецца краіна. Калі нічога не будуем, ну якое развіццё? Можам колькі хочаце гаварыць, але развіцця гэтага не будзе. Дабаўляць у асноўным мы можам у краіне толькі за кошт будаўніцтва. Калі гэта ёсць, значыць, краіна жыве", - сказаў кіраўнік дзяржавы.

Аляксандр Лукашэнка адзначыў, што адносна галіны будаўніцтва ў яго асабіста складваецца неадназначнае ўражанне: "Мы ўмеем будаваць усё, можам рабіць усё, але дзесьці нешта недарабляем, недацягваем".

Пры назначэнні кіраўнік дзяржавы таксама звярнуў увагу на тэму экспарту будаўнічых паслуг. "Будаўнічыя матэрыялы мы вырабляем, будаваць умеем. Таму, наколькі гэта магчыма, экспарт будаўнічых паслуг трэба ажыццяўляць. Але не на шкоду Беларусі", - падкрэсліў беларускі лідар.

Аляксандр Лукашэнка канстатаваў, што часам на будоўлях унутры Беларусі не хапае людзей. Таму трэба акуратна падыходзіць да пытання арганізацыі выезду будаўнікоў за мяжу. "Але трэба старацца. Трэба аказваць нейкія інжынерныя паслугі, спецыялістаў накіроўваць", - адзначыў ён.

Напрыклад, пры рэалізацыі тых ці іншых будаўнічых праектаў у Расіі, чаму ёсць паспяховыя прыклады, можна разглядаць розныя варыянты беларускага ўдзелу. "Самі пабудавалі або разам з мясцовымі будаўнікамі, або яны пабудавалі, але пад нашым кіраўніцтвам. Глядзіце самі, як тут лепш, зыходзячы з наяўнасці працоўных рэсурсаў у нас у Беларусі", - арыентаваў кіраўнік дзяржавы.

версія для друку

зрабіць стартавай

дабавіць у выбранае