Падзеі

Лукашэнка аб акцэнтах у рабоце мясцовай вертыкалі: несці адказнасць за ўсё і не адбрыквацца ад людзей

13 кастрычніка, Мінск /Кар. БЕЛТА/. Кіраўнікі мясцовай вертыкалі павінны несці адказнасць за ўсё, што адбываецца на даручанай ім тэрыторыі, і ўважліва працаваць з людзьмі. Такія акцэнты ў іх дзейнасці расставіў Прэзідэнт Беларусі Аляксандр Лукашэнка, прымаючы кадравыя рашэнні, перадае карэспандэнт БЕЛТА.

Кіраўнік дзяржавы звярнуў увагу, што добра інфармаваны пра стан спраў у канкрэтных раёнах і на прадпрыемствах, дзе праводзяцца кадравыя змяненні. І, вызначаючы задачы для мясцовай вертыкалі, Прэзідэнт зыходзіў у тым ліку з вопыту нядаўніх рабочых паездак у рэгіёны краіны, у тым ліку ў Шклоўскі раён Магілёўскай вобласці, дзе старшыня райвыканкама не быў упэўнены адносна падпарадкаванасці аднаго з сельгаспрадпрыемстваў - тэрытарыяльна яно ў раёне, але ў той жа час належыць Кіраўніцтву справамі Прэзідэнта. "Яно можа каму заўгодна належаць, але кадравую палітыку і парадак забяспечваеце там вы. Я хачу, каб вы гэта пачулі", - звярнуўся Аляксандр Лукашэнка да кіраўнікоў мясцовай вертыкалі. У выпадку ўзнікнення якіх-небудзь пытанняў, рознагалоссяў або недастатковага разумення кіраўнік дзяржавы параіў звяртацца да яго прадстаўнікоў на месцах - памочнікаў і ўпаўнаважаных Прэзідэнта.

"Хачу, каб вы запомнілі галоўнае: чыіхсьці прадпрыемстваў, зямель, кустоў або вёсак, акрамя вашых, няма. Вы там за ўсё адказваеце. Прыватныя прадпрыемствы, якія належаць рэспубліканскаму ўзроўню кіравання, або якія непасрэдна, як вы лічыце, уваходзяць у вашу кампетэнцыю (абласнога або раённага падпарадкавання), - усё гэта ваша. І вы за гэта несяце адказнасць", - падкрэсліў Аляксандр Лукашэнка.

Яшчэ адзін аспект, які вылучыў Прэзідэнт у рабоце мясцовай вертыкалі, - работа з людзьмі. "Не адпіхвайцеся, не адбрыквайцеся ад людзей. Яшчэ раз паўтараю: для нашага чалавека важна часам з ім сустрэцца і пагаварыць. Не трэба сябе адчуваць на галаву вышэй за звычайных людзей. Гэта нашы людзі, мы для іх працуем", - звярнуў увагу кіраўнік дзяржавы.

версія для друку

зрабіць стартавай

дабавіць у выбранае