Падзеі

Лукашэнка і Пуцін у Астане абмяркоўвалі тэму ўвядзення Расіяй СПЧТ

1 чэрвеня, Мінск /Кар. БЕЛТА/. Прэзідэнты Беларусі і Расіі Аляксандр Лукашэнка і Уладзімір Пуцін на нядаўняй сустрэчы ў Астане абмяркоўвалі тэму ўвядзення Расіяй сістэмы пацвярджэння чакання тавараў (СПЧТ). Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Прыморскага края Расійскай Федэрацыі Алегам Кажамякам, перадае карэспандэнт БЕЛТА.

"Заўсёды ёсць праблемы сённяшняга дня. Расія ўвяла так званую сістэму пацвярджэння чакання тавараў. Я баюся, каб не было горш. Але тым не менш з Прэзідэнтам Пуціным у Астане мы дамовіліся, што зробім усё, каб не было ніякіх цяганіны і лішняй бюракратыі. І самае галоўнае, каб зніклі ўсялякія чэргі і іх не было на граніцы. У кантакце з Прэзідэнтам Пуціным, каб своечасова прыняць меры. Паглядзім. Час пакажа. Мы тут у тэме абсалютна. Гэта можа ўскладніць наш гандаль. Але не спыніць", - сказаў кіраўнік дзяржавы.

"У нас абсалютны давер. Вы ведаеце, што дастаткова без усялякіх QR-кодаў, без усялякіх дакументаў: ваша слова з Прымор'я - мы заўсёды зможам прыняць прадукцыю, стварыць для вас умовы для рэалізацыі гэтай прадукцыі. Мы непакоімся, каб наша прадукцыя свабодна паступала туды, ва Уладзівасток", - дадаў Аляксандр Лукашэнка.

Кіраўнік дзяржавы адзначыў, што Беларусь адкрыла ў Прымор'і мультыбрэндавы цэнтр, працуюць магазіны беларускай прадукцыі, якая карыстаецца ў рэгіёне попытам.

"Якасць", - падкрэсліў Алег Кажамяка.

Як паведамлялася БЕЛТА, Расія ўвяла СПЧТ з 1 чэрвеня бягучага года. Гэта дзяржаўная лічбавая сістэма кантролю за імпартам тавараў пры ўвозе з краін ЕАЭС (Беларусі, Казахстана, Арменіі і Кыргызстана). Сістэма дзейнічае для аўтамабільных перавозак.

Заяўляецца, што механізм уведзены для барацьбы з шэрым імпартам, ухіленнем ад выплаты ПДВ і каб падаткі выплачваліся да таго, як тавар перасячэ граніцу. Цяпер імпарцёры абавязаны загадзя перадаваць у Федэральную падатковую службу Расіі даныя аб маючай адбыцца пастаўцы і афармляць электроннае паведамленне. Да фактычнага ўвозу грузу імпарцёр павінен унесці забеспячальны плацёж, які пацвярджае сур'ёзнасць здзелкі, пасля чаго сістэма выдае QR-код. Затым заяўнік перадае гэты QR-код перавозчыку, без якога аўтамабіль не зможа перасячы граніцы ці даставіць тавар у Расійскую Федэрацыю.

Таксама паведамлялася, што 29 мая ўрадам Расійскай Федэрацыі прынята пастанова, якой прадугледжана, што забеспячальны плацеж, устаноўлены заканадаўствам па СПЧТ, не падлягае выплаце пры ўвозе тавараў у Расійскую Федэрацыю з Рэспублікі Беларусь у перыяд з 1 чэрвеня па 31 кастрычніка 2026 года пры выкананні наступных умоў: тавар увозіцца з Беларусі ў Расію праз расійска-беларускі ўчастак дзяржаўнай граніцы; пастаўшчыком тавару з'яўляецца арганізацыя або індывідуальны прадпрымальнік, створаныя (зарэгістраваныя) у адпаведнасці з беларускім заканадаўствам.

версія для друку

зрабіць стартавай

дабавіць у выбранае