Падзеі

Лукашэнка ў Пекіне сустрэўся з членам Пастаяннага камітэта Палітбюро ЦК КПК Цай Цы

2 верасня, Пекін /Кар. БЕЛТА/. Прэзідэнт Беларусі Аляксандр Лукашэнка ў Пекіне сустрэўся з членам Пастаяннага камітэта Палітбюро ЦК Кампартыі Кітая, сакратаром Сакратарыята і кіраўніком Канцылярыі ЦК КПК Цай Цы, перадае карэспандэнт БЕЛТА.

Кіраўнік беларускай дзяржавы назваў Кітай сапраўдным сябрам Беларусі: "За тры дзясяткі гадоў нашага супрацоўніцтва я не магу ўспомніць ні аднаго выпадку, дзе вы непаважліва неяк паставіліся б да нашай краіны, дзе вы не падтрымалі б Беларусь, дзе вы не адказалі б дабром на нашы просьбы. Словам, вы сапраўдныя сябры".

Аляксандр Лукашэнка разлічвае, што вызначаны на яго сустрэчы са Старшынёй КНР Сі Цзіньпінам будучы напрамак беларуска-кітайскага супрацоўніцтва з акцэнтам на прамысловую кааперацыю прынясе вельмі добры плён і вынікі.

Сустракаючыся з Цай Цы, кіраўнік дзяржавы адзначыў, што звычайна на такіх мерапрыемствах пратакольна заўсёды гавораць звычайныя рэчы з удзячнасцю за прыём, за тое, як абыходзяцца з госцем. "У сённяшнім выпадку, у гэтым моманце, я хачу вам абсалютна шчыра (справа не ў дыпламатыі і зусім не ў тым, што трэба быць дыпламатычным), ад усёй душы падзякаваць за ўсё тое, што вы зрабілі, робіце для Беларусі наогул і ў ходзе гэтага майго візіту і дэлегацыі. Вы як вялікая краіна, прадстаўнік вялікай цывілізацыі робіце няўяўнае для гасцей. Не толькі для мяне, а для ўсіх гасцей. А іх тут больш за тры  дзясяткі (на ўзроўні лідараў краін і кіраўнікоў міжнародных арганізацый. - Заўвага БЕЛТА). Вы для іх робіце ўсё, каб яны паехалі з Кітая ў добрым настроі і назаўсёды засталіся вашымі сябрамі", - падкрэсліў Прэзідэнт.

Ён адзначыў, што гэта важна для адносін паміж дзяржавамі. Але ў выпадку супрацоўніцтва з Беларуссю яшчэ важней іншае: "Нам з вамі ўдалося выбудаваць грунтоўны фундамент нашых адносін. У нас трывалыя гандлёва-эканамічныя адносіны. У нас няма праблем у галіне палітыкі, дыпламатыі. Мы заўсёды і ўсюды падтрымліваем адзін аднаго на міжнародных пляцоўках. У нас усталяваліся самыя дружалюбныя цесныя адносіны паміж кіраўнікамі краін".

У сваю чаргу Цай Цы падкрэсліў, што цяпер пад стратэгічным кіраўніцтвам лідараў дзвюх краін у кітайска-беларускіх адносінах усепагоднага ўсебаковага стратэгічнага партнёрства захоўваецца дынаміка імклівага развіцця: "Нашы адносіны, можна сказаць, уступілі ў перыяд найлепшага развіцця ў сваёй гісторыі".

Ён адзначыў, што гэтымі днямі адбылася змястоўная сустрэча Аляксандра Лукашэнкі і Сі Цзіньпіна, у ходзе якой быў дасягнуты шэраг дамоўленасцей, намечаны новыя планы для далейшага развіцця кітайска-беларускіх адносін.

Цай Цы запэўніў у гатоўнасці кітайскага боку да сумеснай рэалізацыі ўсіх дасягнутых дамоўленасцей, развіцця шматпланавага супрацоўніцтва і напаўнення двухбаковых адносін новым зместам.

Ён таксама падзякаваў Аляксандру Лукашэнку за прынятае запрашэнне прысутнічаць 3 верасня ў Пекіне на ўрачыстасцях з выпадку 80-годдзя Перамогі над японскім мілітарызмам і заканчэння Другой сусветнай вайны.

версія для друку

зрабіць стартавай

дабавіць у выбранае