8 мая, Сюйчжоу /Аліна Грышкевіч - БЕЛТА/. Кітайскі Сюйчжоу і Мазыр восенню маюць намер падпісаць дакумент аб устанаўленні пабрацімскіх сувязей. Аб гэтым карэспандэнту БЕЛТА паведаміў сакратар парткама горада Сюйчжоу Цаа Сіньпін.
Ён адзначыў, што ў мінулым годзе на чале кітайскай дэлегацыі ўпершыню пабываў у Мазыры і больш падрабязна азнаёміўся з горадам, магчымасцямі супрацоўніцтва з яго прадпрыемствамі. Кітайскія госці таксама наведалі Мінск, Гомель. У іх засталіся самыя добрыя ўражанні аб прыездзе ў нашу краіну і цяпер у планах - новы візіт у Мазыр восенню і падпісанне пагаднення аб пабрацімстве.
Цаа Сіньпін падкрэсліў, што Сюйчжоу будзе важным пунктам на шляху эканамічнага пояса Шаўковага шляху. Спрадвеку гэты горад лічыцца вытокам культуры дынастыі Хань. Цяпер гэта важны чыгуначны і аўтадарожны вузел у Кітаі. У горадзе развіты машынабудаванне, лагістыка. Тут вырабляюцца вядомыя ва ўсім свеце краны, экскаватары. "Мы хочам зрабіць свой горад цэнтрам на Шаўковым шляху", - заявіў сакратар парткама. Ён адзначыў, што пасля наладжвання цесных сувязей з Мазыром можна будзе сумесна з беларускімі партнёрамі ажыццяўляць праекты ў рамках эканамічнага пояса Шаўковага шляху.