Падзеі

Качанава: Беларусь і Расія - добрыя сябры і браты

Фота з архiва

25 красавіка, Мінск /Кар. БЕЛТА/. Беларусь і Расія - добрыя сябры і браты, заявіла старшыня Савета Рэспублікі Наталля Качанава ў час сустрэчы з Надзвычайным і Паўнамоцным Паслом Расіі ў Беларусі Барысам Грызловым, перадае карэспандэнт БЕЛТА.

"У нашай краіне вас ведаюць як добрага сябра Беларусі. Я ўпэўнена, што наша супрацоўніцтва з вашым прыходам на гэту важную пасаду, вядома, прадоўжыцца і будзе канструктыўным, - сказала Наталля Качанава. - Гаварыць аб тым, што адносіны паміж нашымі краінамі стратэгічныя, няма неабходнасці, таму што гэта сапраўды так. Мы добрыя сябры. Мы браты. І ўсе тыя задачы, якія сёння стаяць перад нашымі краінамі, - для нас гэта вельмі важна. Важна наша ўзаемадзеянне".

Спікер падкрэсліла: дыялог паміж нашымі краінамі развіваецца абсалютна па ўсіх напрамках. "Тыя гістарычныя традыцыі і карані, якія звязваюць нашы народы, дапамагаюць нам у гэтым. У гэтым няма ніякага сумнення. І візіт нашага Прэзідэнта на Далёкі Усход з Прэзідэнтам Расіі яшчэ раз падкрэсліў, наколькі ў нас адкрыты, добры дыялог паміж краінамі. Гэта праўда. Гэта значыць, практычна няма закрытых тэм ні для расіян, ні для беларусаў. Таму што мы разам выбудоўваем нашы дзяржавы - суверэнныя і незалежныя ў такой добрай інтэграцыі, якая склалася паміж нашымі краінамі, - адзначыла яна. - Выбудоўванне дыялогу на вышэйшым узроўні, тое ўзаемадзеянне, якое складваецца сёння па рэалізацыі 28 саюзных праграм, надае нам упэўненасць у тым, што мы будзем узаемадзейнічаць на карысць нашых краін і народаў".

Наталля Качанава дадала, што важна і ўзаемадзеянне парламентарыяў дзвюх краін. "Савет Федэрацыі і Нацыянальны сход Беларусі вельмі цесна ўзаемадзейнічаюць абсалютна па ўсіх напрамках. Гэта і Парламенцкі сход Беларусі і Расіі, Міжпарламенцкая асамблея СНД, АДКБ. Мы шмат гадоў праводзім значнае для нас мерапрыемства - Форум рэгіёнаў Беларусі і Расіі. У гэтым годзе ён пройдзе ў Гродне 23-24 чэрвеня. Гэта апагей таго, што адбываецца на працягу года, таму што мы працуем даволі шмат. Сустракаюцца нашы губернатары, падпісваюцца кантракты, пагадненні, - прадоўжала спікер. - У гэтым годзе запланавана яшчэ адно важнае мерапрыемства па лініі маладзёжнай тэматыкі - "Поезд Памяці", дзе будуць удзельнічаць школьнікі Беларусі і Расіі, па 100 чалавек ад кожнай краіны. Старт будзе дадзены ў Брэсце. Нашы дзеці наведаюць 14 гарадоў Беларусі і Расіі". У кожным з іх будуць зроблены прыпынкі, дзе юнакі і дзяўчаты будуць наведваць памятныя мясціны, прысвечаныя падзеям Вялікай Айчыннай вайны. Фінішуе праект 3 ліпеня ў Мінску.

"Актыўна ў гэту работу ўключыліся ўсе міністэрствы і ведамствы, каб гэта першае мерапрыемства прайшло ўдачна, і мы тады можам разлічваць, што яно стане традыцыйным. Гэта будзе яшчэ адным паспяховым мерапрыемствам, якое дасць магчымасць моладзі сябраваць і добра ведаць нашу гісторыю", - канстатавала старшыня Савета Рэспублікі.

версія для друку

зрабіць стартавай

дабавіць у выбранае