Падзеі

8 снежня, Гомель /Кар. БЕЛТА/. Прэм'ер-міністр Беларусі Андрэй Кабякоў і старшыня ўрада Расіі Дзмітрый Мядзведзеў правялі сустрэчу ў фармаце сам-насам у Гомелі. Сустрэча папярэднічала пасяджэнню ў вузкім складзе і пасяджэнню Савета Міністраў Саюзнай дзяржавы, перадае карэспандэнт БЕЛТА.

Кіраўнікі ўрадаў Беларусі і Расіі наведалі сёння ў Гомелі Рэспубліканскі навукова-практычны цэнтр радыяцыйнай медыцыны і экалогіі чалавека. Андрэй Кабякоў адзначыў, што гэты РНПЦ - адзін з самых сучасных медыцынскіх цэнтраў у Беларусі. Кіраўнік беларускага ўрада прапанаваў прапрацаваць пытанне, як магчымасці цэнтра могуць у большым аб'ёме выкарыстоўвацца расійскім бокам. Патэнцыял для супрацоўніцтва ў гэтай сферы ёсць, лічыць прэм'ер-міністр Беларусі. Дзмітрый Мядзведзеў пацвердзіў інтарэс расійскага боку да ўзаемадзеяння.

У парадку дня пасяджэння саюзнага Саўміна больш за 20 пытанняў, якія закранаюць увесь спектр двухбаковых адносін, асноўны акцэнт будзе зроблены на гандлёва-эканамічным супрацоўніцтве.