16 красавіка, Мінск /Кар. БЕЛТА/. Намеснік старшыні Палаты прадстаўнікоў Нацыянальнага сходу Беларусі Віктар Гумінскі ўзначаліць місію наглядальнікаў ад Міжпарламенцкай асамблеі СНД на выбарах прэзідэнта Казахстана. Аб гэтым паведаміў сёння старшыня Палаты прадстаўнікоў Уладзімір Андрэйчанка ў час сустрэчы з Надзвычайным і Паўнамоцным Паслом Казахстана ў Беларусі Ергалі Булегенавым, перадае карэспандэнт БЕЛТА.
Парламентарыі дзвюх краін на ўзаемнай аснове ўдзельнічаюць у назіранні за выбарамі. "Мы дэлегуем у складзе місіі наглядальнікаў па лініі МПА СНД Віктара Гумінскага, ён будзе каардынаваць работу маніторынгавай групы", - заўважыў спікер.
У маніторынгу прэзідэнцкіх выбараў у Казахстане таксама будуць удзельнічаць прадстаўнікі ЦВК Беларусі - старшыня Лідзія Ярмошына і член Святлана Кацуба.
У пазачарговых выбарах прэзідэнта Казахстана прымаюць удзел тры кандыдаты: дзеючы кіраўнік дзяржавы лідар партыі ўлады "Нур Атан" ("Святло Айчыны") Нурсултан Назарбаеў, член Камуністычнай народнай партыі Казахстана Тургун Сыздыкаў і самавылучэнец старшыня Федэрацыі прафсаюзаў Казахстана Абільгазі Кусаінаў. Выбары ў рэспубліцы павінны адбыцца 26 красавіка 2015 года.