Падзеі

Гласарый у сферы штучнага інтэлекту распрацаваны ў Беларусі

6 кастрычніка, Мінск /Кар. БЕЛТА/. Гласарый у сферы штучнага інтэлекту распрацаваны ў Беларусі, паведаміў журналістам генеральны дырэктар Аб'яднанага інстытута праблем інфарматыкі НАН Беларусі Сяргей Круглікаў перад выязным пасяджэннем Экспертна-кансультатыўнага савета пры Прэзідыуме Савета Рэспублікі Нацыянальнага сходу, які праходзіць у Нацыянальнай акадэміі навук, перадае карэспандэнт БЕЛТА.

"Мы падрыхтавалі гласарый для таго, каб развіваць нацыянальнае заканадаўства. У гэтай прадметнай галіне, як і ў любой іншай, вельмі важна гаварыць на адной паняційнай мове", - сказаў Сяргей Круглікаў, удакладніўшы, што гласарый уключае каля 180 тэрмінаў.

Яго распрацоўкай займаліся Аб'яднаны інстытут праблем інфарматыкі НАН сумесна з зацікаўленымі, а гэта каля 20 міністэрстваў і ведамстваў, якія ўваходзяць у склад адпаведнай рабочай групы.

Гласарый падрыхтаваны і будзе абмяркоўвацца 7 кастрычніка на пасяджэнні рабочай групы па распрацоўцы заканадаўства ў сферы штучнага інтэлекту.

"Каб пачынаць распрацоўваць заканадаўства, неабходна дамовіцца аб паняццях. Гэта вельмі важна, - сказаў Сяргей Круглікаў, тлумачачы мэтазгоднасць падрыхтоўкі гласарыя. - Любы праект патрабуе дакладнага, рэальнага паняційнага апарату, калі ўсе аднолькава разумеюць, што неабходна зрабіць".

Таксама ён паведаміў, што ідзе распрацоўка канцэпцыі развіцця штучнага інтэлекту. Гэта работа праводзіцца па даручэнні Нацыянальнай акадэміі навук.

Што датычыцца вопыту замежных краін, генеральны дырэктар Аб'яднанага інстытута расказаў, што спецыялісты разглядалі і аналізавалі вопыт розных дзяржаў. "У нас ёсць свае нацыянальныя інтарэсы, якія неабходна захоўваць. А таксама цікавы вопыт Расійскай Федэрацыі, Кітая", - сказаў ён.

Сённяшняе пасяджэнне экспертна-кансультацыйнага савета прысвечана тэме выкарыстання тэхналогій штучнага інтэлекту і прайшло на пляцоўцы галоўнай навуковай арганізацыі краіны, дзе засяроджаны істотны інтэлектуальны патэнцыял для даследаванняў і распрацовак у гэтай галіне.

версія для друку

зрабіць стартавай

дабавіць у выбранае