Падзеі

Ганаровае консульства Беларусі адкрылася ў Камеруне

18 студзеня, Мінск /Кар. БЕЛТА/. Ганаровае консульства Беларусі адкрылася ў Камеруне. Аб гэтым карэспандэнту БЕЛТА паведамілі ў пасольстве Беларусі ў Нігерыі.

"У горадзе Дуала адбылася афіцыйная цырымонія ўступлення на пасаду і адкрыцця офіса ганаровага консула Рэспублікі Беларусь у Рэспубліцы Камерун Ігара Калеснікава, - гаворыцца ў паведамленні. - У час цырымоніі губернатар Прыбярэжнага рэгіёна Камеруна Самуэль Дзібуа ўручыў ганароваму консулу Беларусі консульскую экзекватуру".

У мерапрыемстве таксама прынялі ўдзел прадстаўнікі Міністэрства знешніх сувязей Камеруна, пасольства Беларусі ў Нігерыі, органаў выканаўчай і судовай улады, бізнес-супольнасці і СМІ.

Акрамя таго, адбылася сустрэча ганаровага консула і прадстаўніка пасольства Беларусі ў Нігерыі з губернатарам Прыбярэжнага рэгіёна Камеруна, у час якой бакі абмеркавалі перспектыўныя напрамкі супрацоўніцтва паміж Беларуссю і Камерунам. Губернатар выказаў зацікаўленасць наведаць Беларусь для азнаямлення з яе эканамічным патэнцыялам.

Ігар Калеснікаў - грамадзянін Рэспублікі Беларусь, доктар па адукацыі. Жыве ў Камеруне з 1995 года. З'яўляецца выканаўчым дырэктарам камерунскай кампаніі GROUP FORM S.A.R.L, якая ажыццяўляе продаж і сэрвіснае абслугоўванне медыцынскай тэхнікі на тэрыторыі Камеруна, а таксама займаецца прыватнай урачэбна-хірургічнай практыкай у Дуале. Шырока вядомы ў бізнес-колах Камеруна.

версія для друку

зрабіць стартавай

дабавіць у выбранае