Падзеі

"Галоўнае, каб было жаданне працаваць". Лукашэнка аб запрашэнні грамадзян Узбекістана ў Беларусь

23 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка, разглядаючы кадравыя пытанні, выказаўся аб прыцягненні ў Беларусь работнікаў з Узбекістана, перадае карэспандэнт БЕЛТА.

Кіраўнік дзяржавы звярнуў увагу, што наконт тэмы працоўнай міграцыі ўзнялася "цэлая бура". "Ах, вось, узбекаў бяруць!" Я (гавару. - Заўвага БЕЛТА): "І не трэба, мы нікога браць не будзем, але тады нам трэба ўпірацца і працаваць", - заявіў Аляксандр Лукашэнка.

Ён адзначыў, што ў шэрагу рэгіёнаў часам не хапае людзей. Раёны, якім патрабуюцца рабочыя рукі ў тых ці іншых сферах, могуць запрасіць туды адпаведных работнікаў з Узбекістана. Для гэтага кіраўнік прадпрыемства і старшыня райвыканкама павінны вызначыць, колькі і па якіх спецыяльнасцях патрабуецца чалавек. "Калі там не хапае людзей, вы выберыце таго, каго трэба. Гэта і Гродзенскай вобласці датычыцца, асабліва паўночных рэгіёнаў - Астравец і гэтак далей. І там патрэбны людзі. Але там, дзе не трэба, не бярыце. Ніхто нікога не прымушае, - падкрэсліў кіраўнік дзяржавы. - Кіраўнік і старшыня райвыканкама павінны вырашыць: столькі чалавек, на такія пасады".

Прэзідэнт падкрэсліў, што некаторых неабходна будзе давучыць, але пры гэтым галоўная ўмова - жаданне працаваць. "Не трэба чакаць, што там прыедуць вялікія спецыялісты. Яны і там недзе працаўладкаваны. Некаторых трэба проста давучыць, навучыць. Але галоўнае, каб у яго было жаданне працаваць. Вы гэта павінны выразна разумець", - звярнуўся да кіраўнікоў мясцовых органаў улады Аляксандр Лукашэнка.

Беларускі лідар дадаў, што Прэзідэнт Узбекістана папрасіў яго не толькі аб працаўладкаванні людзей, але ў першую чаргу аб пастаўках мяса і малака. Была дасягнута дамоўленасць, што ў Беларусь прыедуць работнікі з Узбекістана для вырашэння гэтага пытання. "Размова ішла аб тым, што яны прыедуць, мяса, малако тут вырабяць. Прэзідэнт (Узбекістана. - Заўвага БЕЛТА) - малайчына, даўно мы з ім дружныя. Ён дае грошы на інвестыцыі - на будаўніцтва жывёлагадоўчых комплексаў, сянажных траншэй - на тое, што ім трэба. На перапрацоўку. Інвесціруе, дае людзей, якія будуць тут працаваць, зарабляць", - сказаў кіраўнік дзяржавы.

Пры гэтым Беларусь гатова забяспечыць работнікаў з Узбекістана сацыяльнымі гарантыямі, у тым ліку жыллём, доступам да адукацыі і аховы здароўя. "Прыязджайце, уладкоўвайцеся. Вось адукацыя дзеткам, калі хочаце, вось ахова здароўя, жыллё. Гэта таксама грошы. А калі вы прыехалі толькі зарабіць і нават дадому адаслаць - гэта іншая сітуацыя", - канстатаваў Аляксандр Лукашэнка.

версія для друку

зрабіць стартавай

дабавіць у выбранае