Падзеі

Галоўчанка наведае з афіцыйнымі візітамі Уганду і Катар

Фота з архiва

19 лютага, Мінск /Кар. БЕЛТА/. Прэм'ер-міністр Беларусі Раман Галоўчанка наведае з афіцыйнымі візітамі Уганду і Катар 20-24 лютага, паведамляе карэспандэнт БЕЛТА.

Паводле слоў прэм'ер-міністра, задача максімальна канкрэтная - трэба дасягнуць патрэбных для краіны вынікаў, рэалізаваць усе існуючыя напрацоўкі, знайсці новыя рашэнні для таго, каб выйсці на рэалізацыю новых сумесных праектаў.

"Уганда ўяўляе для нас сур'ёзны інтарэс, гэта адна з краін Афрыкі, якая найбольш хутка развіваецца, дружалюбная для Беларусі, ёсць кантакты. У краіне ўзяты курс на мадэрнізацыю эканомікі, прыцягненне тэхналогій, развіццё сферы інфармацыйна-камунікацыйных тэхналогій. У той жа час Уганда сутыкаецца з тыповымі праблемамі для афрыканскіх краін. Хутка расце насельніцтва, якое трэба карміць, лячыць, навучаць. Недастаткова выкарыстоўваюцца зямельныя рэсурсы краіны, патрабуецца інтэнсіўная механізацыя сельскай гаспадаркі, індустрыялізацыя эканомікі, здабыча і ачыстка водных рэсурсаў, перапрацоўка адходаў. Інакш кажучы, усё, што мы добра ўмеем рабіць, і ёсць прыклады кааперацыі з замежнымі дзяржавамі. Пэўны тавараабарот з гэтай краінай ёсць, але яго неабходна вывесці на якасна новы ўзровень", - сказаў Раман Галоўчанка.

Катар - краіна з іншымі патрэбнасцямі, іншай палітыкай і эканомікай, адзначыў ён. "Гэта ў першую чаргу наш патэнцыяльны і перспектыўны партнёр для рэалізацыі сумесных высокатэхналагічных праектаў. І нельга забываць аб тым, што Катар з'яўляецца адной з буйных краін-донараў для іншых рэгіёнаў, таму цалкам можна працаваць над рэалізацыяй сумесных праектаў у трэціх краінах з выкарыстаннем беларускай тэхнікі і тэхналогій. Краіна для нас, безумоўна, дружалюбная, шматлікія візіты, поўнае ўзаемаразуменне ў палітычнай сферы", - падкрэсліў кіраўнік беларускага ўрада.

У час візіту ва Уганду Раман Галоўчанка правядзе сустрэчу з прэзідэнтам краіны Яверы Кагута Мусевені ў фармаце "сам-насам". У той жа час члены беларускай і ўгандзійскай афіцыйных дэлегацый правядуць перагаворы. Па выніках запланавана падпісанне міжнародных дакументаў.

У Катары намечана сустрэчы кіраўніка беларускага ўрада з прэм'ер-міністрам - міністрам замежных спраў Катара шэйхам Махамедам бен Абдэльрахманам бен Джасемам аль-Тані. Таксама запланаваны шэраг іншых сустрэч з кіраўніцтвам краіны.

Афіцыйныя візіты Рамана Галоўчанкі ва Уганду і Катар - частка паслядоўнай работы ўрада па развіцці супрацоўніцтва з краінамі далёкай дугі. У 2024 годзе ў графіку візітаў прэм'ер-міністра былі такія краіны, як Венесуэла, Куба, Нікарагуа, Аман і Пакістан.

версія для друку

зрабіць стартавай

дабавіць у выбранае