Падзеі

Дэпутаты ратыфікавалі пратакол да пагаднення Беларусі і Расіі ў галіне экспарту нафты і нафтапрадуктаў

Фота з архiва

23 красавіка, Мінск /Кар. БЕЛТА/. Дэпутаты на пасяджэнні другой сесіі Палаты прадстаўнікоў Нацыянальнага сходу восьмага склікання прынялі законапраект "Аб ратыфікацыі Пратакола аб унясенні змяненняў у Пагадненне паміж Урадам Рэспублікі Беларусь і Урадам Расійскай Федэрацыі аб мерах па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў ад 12 студзеня 2007 г.", перадае карэспандэнт БЕЛТА.

Як адзначыў старшыня Палаты прадстаўнікоў Ігар Сергяенка, Расія - наш стратэгічны партнёр. "Прыняцце гэтага дагавора мае важнае значэнне ў ажыццяўленні энергетычнай бяспекі нашай краіны і далейшым нарошчванні беларуска-расійскага ўзаемадзеяння ў гандлёвай сферы. Расія - наш асноўны гандлёвы партнёр. У мінулым годзе менавіта на яе долю прыпала больш як 60 працэнтаў вартаснага аб'ёму знешняга гандлю таварамі. Аб'ём тавараабароту павялічыўся больш як на 6 працэнтаў і склаў амаль $52 млрд", - падкрэсліў спікер.

Законапраект унесены ў Палату прадстаўнікоў Саветам Міністраў 15 красавіка.

Пратакол аб унясенні змяненняў у пагадненне паміж урадам Рэспублікі Беларусь і ўрадам Расійскай Федэрацыі аб мерах па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў ад 12 студзеня 2007 года падпісаны ў Мінску 6 снежня 2024 года.

Пратаколам прадугледжваецца прадаўжэнне тэрміну дзеяння пагаднення да 31 снежня 2026 года і пры гэтым яго аўтаматычнае прадаўжэнне пасля 31 снежня 2026 года на наступныя гадавыя перыяды, калі ні адзін з бакоў не праінфармуе за тры месяцы да заканчэння чарговага гадавога перыяду іншы бок аб сваім намеры спыніць дзеянне пагаднення. Прадугледжваецца адмена канкрэтнага тэрміну дзеяння нормы аб штогадовым уключэнні ў індыкатыўныя балансы нафты сырой, прызначанай для Рэспублікі Беларусь у аб'ёме 24 млн т, якая пастаўляецца трубаправодным і іншымі відамі транспарту (г.зн. цяпер такая норма дзейнічае на перыяд дзеяння пагаднення).

Пратакол часова прымяняецца пасля заканчэння 10 дзён з даты яго падпісання да ўступлення ў сілу.

Рэалізацыя пратакола дасць магчымасць у мэтах павышэння энергетычнай бяспекі Рэспублікі Беларусь прадоўжыць гандлёва-эканамічнае супрацоўніцтва Рэспублікі Беларусь з Расійскай Федэрацыяй у галіне паставак нафты і нафтапрадуктаў у Рэспубліку Беларусь.

Прыняцце закона не прывядзе да дадатковых расходаў бюджэту. Затрат, звязаных з рэалізацыяй пратакола, таксама не плануецца.

версія для друку

зрабіць стартавай

дабавіць у выбранае